Un grupo de afeccionados busca afeccionados interesados para poñer en marcha unha nova agrupación celtista
02 jul 2024 . Actualizado a las 05:00 h.Un grupo de afeccionados do Celta veñen de lanzar a través de Twitter un proxecto para a creación dunha peña celtista na cidade de Lugo. Tal e como eles lembran, xa existen agrupacións de seareiros do equipo vigués noutros puntos da provincia, tales como Burela, Monforte, Sarria, Vilalba ou Viveiro, pero falta na capital e queren poñerlle remedio a esa carencia.
«Este proxecto nace co obxectivo de ao fin, dotar a Lugo dunha Peña Celtista. Sabemos que no pasado houbo intentos para logralo pero ningún logrou chegar á meta, polo que tras moito analízalo e cavilalo, pensamos que xa é hora que a cuarta cidade de Galicia teña a súa Peña Celtista», proclaman. Lembran que no municipio sempre existiu o celtismo e constatan que «medrou moito nestes últimos anos», mencionando, ademais, as peñas históricas da provincia.
Pero parten da «necesidade de dotar a Lugo como entidade propia desta peña celtista». Por esta razón, fan «un chamamento público a todos/as celtistas lucenses que poidan ver interese neste proxecto para que se poñan en contacto» con eles e poder organizarse. Tampouco pechan as portas a celtistas ou peñistas doutras zonas que queiran botarlles unha man. O seu enderezo electrónico é murallacelestelugo@gmail.com.