Houbo concellos nos que se produciu unha evolución en sentido inverso. Aínda que cunha diferenza mínima, na Fonsagrada, en Bóveda e no Corgo, os tres en Lugo, o confinamento experimentou un lixeiro incremento. No primeiro caso, o illamento medrou un 5,7 %. Estes tres municipios contan cunha poboación inferior aos 5.000 habitantes, polo que as franxas horarias non se chegaron a aplicar e a veciñanza pode moverse sen impedimento. A mobilidade aumentou por riba do 22 % en máis dunha ducia de concellos. A maior suba deuse en Cuntis, un 37 %, mentres que o número de persoas que quedaron na casa reduciuse nun 64,3 %.
Como vén ocorrendo dende o inicio do confinamento, a maior circulación entre concellos transcorre entre Narón e Ferrol. Máis de 28.300 persoas cambiaron o luns 11 de maio do primeiro ao segundo municipio. Outras 27.000 fixeron a viaxe en sentido inverso. Entre as dúas vilas non hai barreiras xeográficas, e segundo datos facilitados polo Instituto Galego de Estatística o 27 % dos residentes en Narón naceron en Ferrol. O outro gran fluxo prodúcese de Oleiros á Coruña, con máis de 50.000 desprazamentos en total en ambas as direccións. Ese día, movéronse máis persoas entre Ourense e Barbadás ca entre Cangas e Vigo, e viceversa.
