Luís Villares: «En Marea é a única forza progresista galega que non ten as mans atadas»

Pensa que non é posible reconstruír o espazo rupturista: «Hai decisións tomadas en Madrid que o impiden»


santiago / la voz

A enquisa de Sondaxe non lle dá representación a En Marea de cara as autonómicas. Aínda así, Villares asegura que se van presentar, «en solitario ou con acordos preelectorais ou poselectorais».

-Que lle leva a presentarse malia os malos augurios das enquisas?

-As enquisas apuntan tendencias e desde o último resultado electoral estamos máis que duplicando a intención de voto. Hai unha remontada evidente que se sustenta nun magnífico traballo na rúa e no Parlamento, e a xente o está vendo. Un exemplo: promovemos o debate da despenalización da eutanasia e o PP gañou a votación, pero nós gañamos o debate. A xente venos como actores necesarios.

-Non corren o risco de confundirse con BNG?

-Hai unha parte do noso discurso que coincide co do Bloque pero é máis amplo que o do Bloque, porque o soberanismo é máis amplo que o nacionalismo. Aspiramos a un universo máis extenso que o do BNG, que é moi necesario, pero nós queremos abranguer franxas maiores.

-Houbo conversas co BNG?

-Para as xerais houbo conversas con todas as forzas soberanistas galegas, pero non fraguaron. Nós decidimos que o noso proxecto ten vontade de sobrevivir de forma soberana e iso implica ir ás eleccións. Fixemos unha chamada moi ampla para unir forzas e seguimos abertos a iso.

-Ao Bloque cústalle falar coas forzas que marcharon do Bloque?

-En Marea non marchou do Bloque, non somos unha escisión do BNG. O noso proxecto tamén seduciu no seu día á parte máis soberanista do PSOE e pode seducila de novo. Nós queremos movernos nesas coordenadas.

-Ese desacordo non pode poñer en risco a maioría que lle pode arrebatar a Xunta ao PP?

-Iso debería facernos reflexionar colectivamente. A unha organización política non se lle pode pedir nin que se disolva nin que non se presente ás eleccións, pero o que se si se lle pode pedir é capacidade de diálogo, e nós témola, e sen complexos. A reflexión compartida de todas as forzas progresistas galegas é o deber de dialogar. A nosa achega colaborativa con outras formacións políticas tería froitos definitivos.

-Como?

-Un 3 % de votos por libre non acada representación, pero sumado a outra forza pode converter ese proxecto colectivo na chave da derrota da dereita.

-E se lle ofreceran a vostede ir nas listas do Bloque?

-A miña achega individual non é relevante, se eu represento algo é como transmisor dunha idea que é a do proxecto de En Marea, así que calquera acordo será colectivo, con En Marea como actor político.

-Que lectura fai da reaparición dos exalcaldes das mareas?

-Eu vin simplemente unha reunión de traballo entre xente de varias cidades. Estamos a falar dunhas eleccións autonómicas que requiren proxectos serios para Galicia. O municipalismo está ben pero para unhas eleccións galegas fai falla un proxecto nacional sólido como o que ofrece En Marea.

-Non é posible reconstruír a En Marea do 2016?

-Non. Hai decisións tomadas en Madrid que o impiden.

-Cre que Podemos está a subestimar a Anova como fixo antes con En Marea?

-Podemos só quere a Anova para unha cousa, para darlle un verniz galeguista a un proxecto que a xente sabe que non ten carácter autonomista.

-Por que é necesario que se presente En Marea?

-Porque é a única forza progresista que non ten as mans atadas. O PSOE e Podemos están atados por unha coalición co apoio do BNG e no seu discurso político son presos deses acordos. Nós non, somos unha forza soberana. Temos as mans libres para falar alto e claro de dereitos sociais, de plurinacionalidade e de dereitos democráticos, e non facemos concesións.

-Pagaron a pena os desgustos e as leas destes tres anos?

-Desde o punto de vista persoal recoñezo que pasei malos momentos, moi malos momentos, pero o balance é positivo porque defender uns ideais e representar aos teus cidadáns é un honor, e ter a oportunidade de ser a voz de quen non pode levantala, si paga a pena. Eu son un optimista impenitente.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
8 votos
Comentarios

Luís Villares: «En Marea é a única forza progresista galega que non ten as mans atadas»