Davide Rodríguez: «Hai xente que aínda non rompeu o cordón umbilical con AGE»

Apostou por ir con Villares porque cre que o seu programa é «a marea das inscritas», á marxe das cúpulas


Santiago / La Voz

Deixou a alcaldía de Manzaneda (Ourense), aparcou a guitarra e quitoulle tempo á familia e á cooperativa Amarelante para dedicarse ao traballo parlamentario como deputado de En Marea. Ao principio, a Davide Rodríguez (Manzaneda, 1978) víaselle incómodo na moqueta do Hórreo, pero vaise afacendo. De feito, non descarta presentarse de novo. «Estou aprendendo moito e creo que En Marea está a facer un bo papel. Pero aínda é pronto para decidir, e ademais hai que contar coa familia». Non máis de oito anos, iso si.

-Vostede é de Anova, pero foi na candidatura de Villares. Que pensa das liortas internas?

-Penso que as inscritas xa falaron e é responsabilidade de todos e de todas atender á cidadanía e deixarnos de leas. Hai dous anos eu concorrín ás eleccións internas de En Marea como cabeza de lista de Somos Quen, e perdín, pero ao día seguinte puxémonos a traballar, no consello e na coordinadora, por responsabilidade. Non sei por que non o fan os críticos, pero, se eu os votara, sentiríame ofendido.

-Cre, entón, que a responsabilidade é das cúpulas?

-Penso que os que optamos por ir nesta candidatura do consello con Villares fixémolo porque seguimos as verbas de Beiras na asemblea fundacional de Vigo, onde se deixou claro que a representación de cotas de partidos tiña que acabar. Os partidos teñen que ser motores, pero son os inscritos e as inscritas quen deciden a deriva da organización política, que é En Marea. Pode ser que haxa xente que aínda non rompeu o cordón umbilical con AGE. En Marea é outra cousa.

-Segue a ter unha boa relación con Antón Sánchez, voceiro nacional de Anova?

-Si, é boa. Dentro da discrepancia que temos, a nosa relación segue a ser boa.

-Van dous anos de actividade parlamentaria, vostede en medio rural. Está satisfeito?

-Estase logrando moito. Van nun ano 150 reunións con distintos sectores, tanto no agro como na gandaría, no forestal ou nos bombeiros. No momento no que ti trasladas a voz da xente ao Parlamento e logo esas persoas ven que o Goberno lles contesta, pois iso compensa. Ademais en moitos casos o Goberno está mentindo, como pasa cos datos do sector leiteiro, cos das explotacións, na privatización de servizos forestais..., e iso tes que sacalo á luz. Na comisión de medio rural estou con Antón Sánchez, que tamén sabe do tema, e penso que entre os dous estamos facendo un traballo moi digno, e o mesmo pasa nas outras comisións, en sanidade, educación, cultura, servizos sociais, medio ambiente... Penso que En Marea está deixando o listón moi alto, e non só no traballo do Parlamento, senón tamén na rúa.

-Apenas hai círculos de Podemos en Ourense. É de supoñer que En Marea non terá alí problemas para formar candidaturas.

-No 2015 fomos baixo o paraugas de Son e temos representación en Ourense, Toén ou O Pereiro de Aguiar, alcaldía en Manzaneda, concelleiros na Pobra de Trives... Agora levamos feito un traballo transversal e hai mareas en Verín, Laza, Chandrexa, Manzaneda, Trives... Queremos presentar candidaturas na maioría dos concellos. Pero a guerra tampouco é coa xente de Podemos, eu convivo e traballo con eles. Son as cúpulas, non as bases.

-Como valora o papel de Villares?

-Penso que está a ser un moi bo voceiro, aínda que en dous anos terase que someter, coma todos, ás primarias. Pero a min gustaríame que En Marea siga a ser, como é agora, a marea das inscritas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Davide Rodríguez: «Hai xente que aínda non rompeu o cordón umbilical con AGE»