Aprender galego á vez que se escoita boa música é posible co curso de La Voz

Accede a nova unidade temática do curso de galego


La Voz

A semana pasada foi o cine o que lles axudou aos usuarios do curso de galego de La Voz a melloraren o coñecemento e o uso do idioma. Esta semana será a música a que asuma esa función de facer que a aprendizaxe sexa amena e eficaz. E o certo é que músicos e música en galego non faltan. Nesta ocasión serán as cancións de Guadi Galego e de Iván Ferreiro as que fagan o seu labor pedagóxico. A primeira coseu tema Matriarcas, e o segundo con Fariña. Os dous protagonizan un dos textos da unidade nove, aberta na páxina web de La Voz. Onda eles, o festival musical Sinsal, que cada ano se celebra na illa de San Simón.

Tratándose dun tema sobre música, a parte oral non podía ser outra que os propios temas de Guadi Galego ou Ferreiro. Pero tampouco faltan á súa cita semanal Sabela e Paulo, que na súa conversa afondarán nos coñecementos lingüísticos que forman esta unidade.

Neste aspecto, a lección nove insiste en aspectos como a correlación temporal nas construcións relativas ou o estilo directo e indirecto. Os recursos para expresar sentimentos ou desacordo ou a acentuación son outros dos contidos nos que incide o espazo que desde hoxe completa o curso.

A música é tamén unha boa compaña para percorrer o Camiño de Santiago. E precisamente a ruta xacobea é o tema doutro dos textos da unidade. Porque, como sabe ben quen segue o curso, a idea non é só aprender galego, senón coñecer ao mesmo tempo moitas cousas sobre Galicia, as súas paisaxes, a súa economía, a súa sociedade ou as súas artes.

Coma cada xoves, no peche do tema contamos coa proba de lume: dez actividades de autoavaliación para que quen complete a unidade poida comprobar se domina os coñecementos que se trataba de aprender nela.

Porque non debe esquecerse que o obxectivo do curso é proporcionar o dominio do galego necesario para superar os exames oficiais do nivel Celga 3.

O próximo xoves, último tema

A unidade que hoxe abre é a novena. Só queda, polo tanto, outra pendente, porque o curso componse de dez temas. Desde finais de novembro, xoves tras xoves, foise abrindo unha nova unidade na web, ata o xoves que vén, cando a totalidade do curso estará aberto e á disposición dos usuarios.

A proposta de La Voz e da dirección xeral de Política Lingüística foi deseñada pola empresa Netex, e ofrece aos visitantes da web a posibilidade de mellorar o seu galego de forma amena, sinxela e gratuíta. Para acceder por primeira vez só é necesario abrir a web de La Voz de Galicia, buscar o apartado do curso e proporcionar un correo electrónico e poñer un contrasinal. Unha vez cumpridos eses pasos poderase acceder ao curso tantas veces como se queira.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

Aprender galego á vez que se escoita boa música é posible co curso de La Voz