Antón Gómez-Reino: «O debate da autodeterminación non está enriba da mesa agora en Galicia»
GALICIA
Irá hoxe ao plenario de En Marea para defender que Podemos «ten un papel fundamental» na unidade popular
27 oct 2018 . Actualizado a las 05:00 h.Antón Gómez-Reino (A Coruña, 1980) non cre que gañara as primarias de Podemos Galicia por ser o candidato de Pablo Iglesias. «Quen gañou foi Podemos Galicia», sostén. Pero si achega unha clave que considera que foi vital na súa campaña: «Unidade, unidade, unidade».
-Bescansa vén de anunciar que deixa a súa acta de deputada. Que pensa ao respecto?
-Hai decisións que son estritamente do ámbito persoal, e eu son absolutamente respectuoso. Carolina é unha compañeira e estou convencido de que, desde o día a día, ou desde fóra, saberá achegar a Podemos e ao espazo de cambio.
-Hai dúas maneiras de entender Podemos en Galicia?
-Nós agora temos unha visión de futuro e non teño ningunha dúbida de que a partir de agora imos traballar cun obxectivo común, xa non se vai falar de listas.
-Terá autonomía Podemos Galicia ou estará ao ditado de Iglesias?
-Queremos un Podemos Galicia autónomo que se pareza a este país, que temos que construír desde aquí, pero temos que chegar a acordos de forma fraterna con resto do Estado, e Podemos a nivel estatal defende a plurinacionalidade.
-Estará no plenario de En Marea?
-Si, estarei.
-Que papel quere xogar Podemos dentro de En Marea?
-Podemos ten que ter un papel fundamental nas alianzas que hai que construír para ter maiorías sociais, pero errariamos se nos damos sistematicamente na pedra das fórmulas xurídicas.
-Os inscritos votaron que preferían ir en coalición, preservando a marca Podemos e non coma ata agora.
-Vexo ben a fórmula da coalición cos nosos aliados; máis alá diso, é un erro se sistematicamente estamos a falar de fórmulas xurídicas. Temos que preocuparnos das cousas que lle preocupan á cidadanía e ser quen de construír maiorías que despracen ao PP.
-Que relación ten con Villares?
-Teño unha relación moi cordial, dialogamos como voceiros, no meu caso do Congreso e no seu do Parlamento de Galicia. Mandou un saúdo cordial desde as redes sociais e a partir de agora hai que buscar as mellores fórmulas para traballar conxuntamente.
-Aproba o seu traballo político?
-Está a facer un bo traballo como voceiro no Parlamento.
-O goberno da Coruña escúdase na boa vontade para xustificar o que pasou cos pisos ou co concurso que premiaba non ser heterosexual. A boa vontade xustifícao todo?
-A Marea Atlántica está facendo un magnífico labor. É un goberno de corrupción cero, coma todos os das mareas. Pero en política hai erros porque todos somos humanos, e hai que recoñecelos, resolvelos e seguir adiante.
-Como valora vostede o traballo dos tres alcaldes das mareas?
-Xulio, Martiño e Jorge son un referente non só no país, son unha referencia a nivel do Estado. É o espazo que máis cidades goberna. O seu traballo é complexo, pero están levando as cidades a un escenario diferente, de corrupción cero, onde as persoas contan e as políticas públicas están no centro, e iso hai que consolidalo no 2019.
-Como ve o conflito catalán?
-Os problemas políticos hai que resolvelos politicamente e en democracia a responsabilidade dos líderes políticos é saber dialogar deixando fóra da axenda pública a tensión. Hai que normalizar a situación en Cataluña e camiñar cara a un escenario de democratización da sociedade catalá. Quen fai o contrario creo que o fai por intereses políticos e electorais.
-Albisca un horizonte de autodeterminación en Galicia?
-É evidente que en Galicia ese debate non está agora enriba da mesa. É un debate que hai que abrir de forma mesurada no conxunto do Estado e falar tanto do modelo territorial como da reforma constitucional.