Gonzalo Caballero: «Resolvín a miña candidatura á Xunta porque o escenario político é incerto»

Juan María Capeáns Garrido
Juan capeáns SANTIAGO / LA VOZ

GALICIA

Sandra Alonso

O referente dos socialistas galegos ve o PP «afundido en España e tocado en Galicia», e teme adiantos electorais

21 oct 2018 . Actualizado a las 05:00 h.

Gonzalo Caballero Míguez (Ponteareas, 1975) fixo nos últimos días unha xogada tan natural como estraña, pola súa silenciosa estratexia. Como secretario xeral do PSdeG resolveu ser o candidato á Xunta, que é o tradicional no seu partido, pero utilizando unha vía rápida que impediu que xurdisen outras alternativas. Aparentemente non ten rival orgánico, pero si que hai certo malestar polo procedemento.

-Por que andar ás présas se, en teoría, quedan dous anos para as eleccións galegas?

-Galicia é unha nacionalidade histórica e o presidente pode convocar eleccións cando o considere preciso, por iso temos que estar preparados para ter un proxecto forte para propiciar o cambio político.

-Ao converterse en candidato sen rivais nin votacións, non traizoa o espírito das primarias?

-A min gústanme as primarias, que é o sistema establecido polo partido, e polo tanto abrimos o proceso de elección de candidato á Xunta a toda a organización. A tradición é que o secretario xeral sexa o cabeza de lista: así foi con González, Zapatero e Sánchez, e tamén con Touriño. Pero decidín resolver os deberes orgánicos porque estamos nun escenario político incerto sobre as convocatorias electorais, e creo que tomar a iniciativa e pechar estes procesos internos vainos dar máis forza. O certo é que cando o partido fixo primarias preto das eleccións os resultados non foron tan bos como esperabamos.

-Xa, pero aínda non resolveron os candidatos das cidades, e as municipais serán, seguro, no 2019.

-O que ninguén sabe é cando van ser as próximas eleccións xerais e autonómicas, e o que quixen foi trasladar á sociedade que o PSdeG xa é unha organización na que se pode confiar.

-Hai certo malestar nas bases; está en disposición de facer un acto multitudinario para amosar a súa forza, que é o propio?

-Nós somos un partido de militancia. Fun o candidato das bases e agora o apoio é máis amplo. Neste ano o PSdeG avanzou, todo o mundo o recoñece, aínda que hai cousas que mellorar.

-Cales?

-Agora toca intensificar o esforzo por conectar o partido coa sociedade, e por iso vou poñer en marcha con carácter inmediato un laboratorio de ideas no que estivemos traballando no último ano.

-Perdeu a oportunidade de participar no recente debate de política xeral: cando vai entrar no Parlamento?

-Cando fun elixido dixen que ía manter durante un tempo razoable, polo menos un ano, a miña actividade académica e laboral na Universidade de Vigo, porque creo que nun momento no que a política está afastada da sociedade é bo trasladar que un chega coa vida laboral resolta, que veño con vontade de servizo público. Ese compromiso cumpriuse, e a partir de aí estou a disposición da organización.

-Sexa concreto: hai data?

-Non hai data, pero podo asegurar que poñerei a Feijoo contra as cordas no próximo debate de política xeral [en outubro do 2019].

-Non é unha ousadía traballar a tempo parcial para bater unha maioría coma a do PP?

-Moitas das visións tradicionais da política están mudando. Hai seis meses ninguén predicía que Pedro Sánchez ía ser presidente e que o PP estaría afundido en España e tocado en Galicia. Hai que escapar de moitas imaxes preconcibidas. Temos 23 meses para desenvolver a nosa estratexia, e, cando a organización o considere, entrarei no Parlamento. Iso pode acontecer proximamente, pero non existe unha data pechada. Será ao longo deste curso político.

-Está facendo unha preparación específica e persoal para o corpo a corpo con Feijoo?

-Estou afeito ao debate de ideas e á confrontación de argumentos. É un espazo no que me sinto cómodo. Non é algo que me preocupe en clave persoal, pero é certo que un ten que adecuarse a un novo escenario, imprevisto pola miña parte un ano atrás. É unha alta responsabilidade estar á altura das circunstancias e do que Galicia reclama, e para iso hai que dedicarlle cabeza, temperanza e tamén ilusión.

-Teme os golpes baixos?

-Un gran empresario galego que cre que o PSdeG está en condicións de liderar a próxima Xunta advertiume para que estea preparado para os ataques máis furibundos en todo tipo de planos, e sei que van ser contundentes. Por iso estou preparando a miña capacidade persoal.

-Porén, Feijoo trata a Leiceaga con respecto, ata con certa condescendencia, semella.

-Leiceaga está facendo un magnífico traballo, é un bo portavoz, con solvencia intelectual e política, e creo que está sendo capaz de trasladar boas ideas no Parlamento. O PP xoga as súas estratexias. Eu teño unha relación correcta no persoal co presidente da Xunta e hai capacidade de diálogo, pero iso non quita que Feijoo deixe unha Galicia peor, con menos poboación e máis avellentada, cunha economía feble e con recortes sociais.

-Algúns deses argumentos son vellos, do 2012, do 2016...

-A esquerda en Galicia quedou descolocada tras perder o Goberno no 2009, pero agora Feijoo sabe que as contas non lle dan, e que se hoxe houbese eleccións non estaría en condicións de reeditar a maioría.

-O PP aínda airea a etapa do bipartito, poderá defendela?

-O Goberno de Touriño permitiu abrir as fiestras e modernizar a economía de Galicia con máis dereitos sociais.

-O lóxico é que precise socios; que opina do resto da oposición?

-Nós temos que nuclear o cambio, e as outras organizacións de esquerda teñen que facer o seu traballo, iso é o que opino.

-Con quen ten máis afinidade: En Marea, Podemos, BNG?

-O resto dos partidos teñen que seguir a súa propia axenda e nós manter as vías de diálogo abertas. A miña afinidade ten que ser coa sociedade galega, e para iso precisaremos unha coalición social cos sectores cidadáns, empresariais, sindicais, de estudantes, da xente dos servizos públicos, dos que queren mudar Galicia co PSdeG á fronte.

«O alcalde de Vigo é unha referencia e mantemos unha relación boa e frutífera»

O PSdeG pasou de vivir ao ataque permanente co binomio Feijoo-Rajoy a ter que defender a parcela do Goberno central.

-Cando o veremos anoxado cunha decisión do presidente Pedro Sánchez?

-Nós temos que poñer en valor que o Goberno de Sánchez está a tomar medidas que benefician ao conxunto dos galegos porque temos pensións e salarios máis baixos e maiores dificultades sociais que outros territorios.

-O reparto de cargos é a mellor cura para as feridas orgánicas: botáronlle sal con Javier Losada?

-Eu teño unha moi boa relación co delegado do Goberno. O traballo nestes meses está sendo diario e de total conexión, e aínda esta semana trasladoume a súa satisfacción e os parabéns por ser o candidato á Xunta, e está traballando de forma coordinada coa dirección do PSdeG.

-Como vai resolver as candidaturas das cidades?

-Repito: somos un partido de militancia e primarias. Onde gobernamos temos un respaldo crecente, namentres que o PP non foi capaz de aprobar uns orzamentos en Ourense, e outras forzas políticas emerxentes teñen problemas de xestión e xeran insatisfacción nas cidades.

-Co seu apoio, por certo.

-Agora imos pechar estes catro anos de mandato municipal co convencemento de que o PP non vai gobernar máis nas cidades, e imos trasladar á militancia o feito de que van ser corresponsables á hora de definir as mellores opcións nas cidades e, dende logo, a min vaime corresponder apoiar os candidatos.

-Recibiu presións para que algúns candidatos non pasen polo filtro das primarias?

-O sistema xeral é de primarias, e a partir de aí en cada concello pódense buscar liñas de cooperación entre os posibles candidatos para que adopten posicións conxuntas ou coordinadas. Cando non sexa así, votarán os militantes. Os que saian contarán con todo o meu apoio e o meu traballo será reforzalos. Teño ducias de solicitudes para estar nos diferentes concellos.

-Vai pedirlle a Abel Caballero que traballe tanto polo socialismo como fai polo viguismo?

-O alcalde de Vigo é unha referencia en España. Dende que fun elixido secretario xeral hai un ano está traballando en coordinación coa dirección. A el correspóndelle estar ao servizo de Vigo, e a min promover un proxecto socialista para o conxunto de Galicia. A relación é boa e frutífera.