Román Rodríguez: «A adecuación de prazas en Maxisterio non suporá o peche de facultades»

O conselleiro de Educación vén de presentar no Senado a súa proposta dun «numerus clausus» de alumnos de Educación


redacción / la voz

«O noso profesorado ten un notable alto, pero temos que aspirar a un sobresaínte, porque o futuro da nosa sociedade pasa pola educación». O conselleiro de Educación, Román Rodríguez, repite varias veces esta frase ao longo dunha entrevista centrada na proposta que presentou esta semana no Senado: vincular -«adecuar» é o termo que utiliza, porque non lle gusta falar de numerus clausus- a cantidade de graduados en Maxisterio (Educación Infantil e Primaria) á capacidade de absorción laboral do sistema educativo.

-Isto ten algo que ver co mir que anunciou o ministro o pasado sábado?

-É unha proposta dentro do debate xeral: eu leveina ao Senado e inclúe outras fases, pero ten que ser de ámbito estatal. A primeira sería a adecuación do número de prazas á capacidade de absorción laboral do sistema. Non é algo que inventase eu, xa o ano pasado a Conferencia de Decanos de Educación pediu isto mesmo, porque ter un número de graduados moi por riba do que se necesita xera moita frustración a estes alumnos. A segunda fase sería un proceso semellante ao mir, e digo «semellante» porque os dous servizos teñen moitas diferenzas organizativas, estruturais... E a terceira fase é programar unha carreira docente, unha formación continua con incentivos que sexan máis que os biolóxicos, como participar en proxectos de innovación ou implicarse na formación continuada.

-Pois a idea do mir parece que non gustou aos profesores, nomeadamente aos sindicatos.

-Non o entendo, porque non vai nunca en contra do profesorado, senón a favor da súa consideración social e o seu prestixio. A cuestión é ter os mellores profesores posibles, e iso non quere dicir que hoxe non sexan bos. En Galicia temos 30.000 docentes no servizo público e somos a terceira comunidade de España, así que podemos dicir que os nosos mestres e profesores son moi bos. Temos un profesorado de notable alto, pero temos que aspirar a un sobresaínte, e podemos fixarnos naqueles procesos que melloraron outros ámbitos, como o da medicina. O primeiro beneficiado sería o profesor.

-Teñen medo de que os profesores en prácticas se convertan en mestres «baratos».

-Pero falan de suposicións, porque en ningún momento se manifestaron sobre o que vai ser. Non o sabemos. Non ten sentido falar de salarios, é un ruído innecesario neste momento. Cústame pensar que un profesor non queira ter a percepción social dun médico.

-Volvamos á súa proposta de revisión do alumnado de Educación. Suporá en Galicia, unha comunidade con seis facultades, o peche dalgunha?

-En absoluto. A adecuación do alumnado de Maxisterio non suporá o peche de ningunha facultade. Non é algo que acabaramos de inventar, é unha demanda dos propios decanos. Facer unha carreira supón investir moito tempo e esforzo para un rapaz, e diñeiro que lle custa á súa familia, e tamén inviste o Estado. Calquera alumno que está a facer hoxe o grao de Educación quere devolverlle á sociedade o que a sociedade investiu nel, e quere vivir de acordo co que el mesmo investiu. Non podemos permitir que todo ese esforzo, duns e doutros, se converta en frustración.

-Di vostede que Galicia ten moito de que presumir en educación. Fíxoo en Madrid esta semana?

-Galicia mellorou moito en calidade e en equidade. Estamos no primeiro posto de España nisto, temos a maior porcentaxe de alumnos con necesidades educativas especiais nas aulas ordinarias. Isto fíxose cun esforzo moi notable, pero aínda queda moito por facer. Aínda así, non debemos ser negativos; moitas veces pensamos noutros lugares e talvez se os coñecésemos quedariamos máis contentos co que temos, se soubésemos como atenden aos rapaces con necesidades educativas especiais en Holanda ou Alemaña...

Newsletter Educación

Recibe todas las semanas la información más relevante sobre educación

Votación
9 votos
Comentarios

Román Rodríguez: «A adecuación de prazas en Maxisterio non suporá o peche de facultades»