Fernando Souto: «Pardo Bazán faría unha gran obra co esperpento que se está a vivir en Meirás»

A Comisión pola Recuperación da Memoria Histórica de A Coruña vén de levar ao Congreso unha iniciativa para ilegalizar a Fundación Franco, que xestiona o pazo


A Coruña / La Voz

O pazo de Meirás leva case un mes sendo xestionado pola Fundación Nacional Francisco Franco (FNFF). Practicamente todas as institucións denunciaron a situación dada no palacete propiedade da familia do ditador. Sen embargo, aínda ninguén deu coa chave para evitar que a asociación exalte a figura de Franco e o seu réxime durante as visitas guiadas ao espazo situado no concello de Sada. Onte foi a Asociación para la Recuperación da Memoria Histórica a que presentou no Congreso unha iniciativa para ilegalizar a FNFF. Tamén desde A Coruña estanse a dar pasos cara un único fin: «Devolver o pazo a quen o pagou». Para iso, a Comisión pola Recuperación da Memoria Histórica local constituíu a Xunta Pro Devolución do pazo de Meirás, na que se poderían enrolar os concellos e institucións que «defendan o uso público deste espazo».

-Como reciben a nova de que a Fundación Nacional Francisco Franco xestiona as visitas ao Pazo?

-Como todo o mundo. Foi a través dunha entrevista á filla de Franco. O que é sorprendente é o comunicado da FNFF, asumindo esta situación con total normalidade. É unha situación esperpéntica.

-Cal sería a medida máis urxente para poder resolver esta situación?

-O primeiro paso é a ilegalización dunha entidade que non cumpre os principios básicos democráticos. O segundo paso será que a xestión do pazo pase a mans de institucións democráticas, como é o Concello de Sada, ao que nós apoiamos nestes termos. E o terceiro sería a devolución do espazo a quen o pagou, que son os veciños e a cidadanía en xeral.

-Como é posible que non se soubese desde un comezo que a FNFF xestiona o pazo?

-É unha evidente situación de impunidade da familia Franco. Non dan explicacións a ninguén. Están nunha especie de limbo e crense os señores de Meirás. Non cren nos principios democráticos e, por iso, consideran que non teñen que dar explicacións.

-Que opinan da actitude da Xunta ou do Goberno ante esta situación?

-Teñen que ter moita precaución, xa que son os representantes lexítimos do Estado. Están adoptando posicións tibias fronte a defensa da democracia. Aquí non hai bandos, só existe o bando democrático. Fóra, non hai lei. Nós actuamos continuamente coas institucións e esiximos unha maior claridade ao Goberno e á Xunta. Hai que recordarlles que son os lexítimos representantes do pobo.

-Atenderá o Congreso á súa petición para ilegalizar á FNFF?

-A FNFF naceu en 1977. Polo tanto, non cumpre a lei de fundacións. Non é unha cuestión de ilegalización, senón que non é legal. Hai que actuar desde as institucións e adoptar medidas para que se respecten os dereitos mínimos. Esta entidade nega as vítimas do franquismo. Non entendemos como non se actúa ante esta situación e si noutras moito máis cuestionables.

-Consideran este movemento como unha burla por parte da familia Franco?

-É unha auténtica provocación que a Fundación Franco xestione o pazo. Emilia Pardo Bazán faría unha gran obra de teatro co esperpento que se está a vivir en Meirás. Un espazo de liberdade e creación estase a converter nun reduto dunha familia que se nega a entrar no século XXI. O pazo de Meirás é a punta dun iceberg para a nosa asociación. Esta volta ao pasado ponlle os pelos de punta desde a un votante do PP ata o último militante do Partido Comunista.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
12 votos
Comentarios

Fernando Souto: «Pardo Bazán faría unha gran obra co esperpento que se está a vivir en Meirás»