Román Rodríguez: «Temos dous anos para ver cales son os puntos fortes e febles das reválidas»

Hoxe comeza o curso en infantil e primaria, e a principal novidade deste ano escolar é o remate da implantación da Lomce e as famosas reválidas. Román Rodríguez (Vento, Lalín, 1968), pide tranquilidade, porque hai tempo para ver cómo funcionan estas probas que moitos rexeitan.

-Este ano acaba a implantación da Lomce, ¿que lle trouxo de positivo ao sistema educativo?

-Foi unha aposta por mellorar certas variables do ensino, e estao acadando paso a paso, con dificultades. Fomos capaces de poñer en marcha modalidades como a FP básica, que incide na integración dos alumnos con dificultades, e tamén de xerar unha maior autonomía dos centros a través de materias de libre configuración.

-Os sindicatos anuncian un principio de curso conflitivo polas reválidas.

-Todos os anos se anuncia un inicio conflitivo. Ao final o tempo dá e quita razóns e afortunadamente máis alá de cuestións puntuais o curso comeza con certa normalidade. Hai que mirar a educación non como un campo de conflito, senón como un campo fundamental para o futuro.

-Pero a estas alturas aínda hai moitas dúbidas: onde se van a examinar os rapaces da reválida, quen corrixe as probas...

-Hai que ter tranquilidade, o Ministerio anunciou que en tempo e forma terá todo deseñado. Hai que ter en conta que este ano as avaliacións por así dicilo son experimentais, só a de bacharelato substitúe ás probas de acceso á universidade, así que practicamente vai ser moi semellante á selectividade. Eu pido que non se xere un debate artificial ou incerto e que sexamos conscientes de que para o sistema educativo avaliar é positivo.

-¿É partidario o conselleiro de que se faga nas facultades a reválida de bacharelato?

-Si, vai ser practicamente moi semellante ás PAU. As probas de avaliación de bacharelato fanse en todos os países da UE e non van xerar ningún problema, xa que é substituír a que existía facendo uns leves cambios.

-Os rapaces de cuarto que aproben a ESO e suspendan a reválida so poden ir á FP básica. ¿Non se vai crear un limbo con estes alumnos?

-Insisto na tranquilidade, porque temos dous anos para traballar, e neses anos temos que ver cales son os puntos fortes e febles da reválida. Seguramente se poderán orientar, corrixir e mellorar todas aquelas cuestións que poidan xerar certa dúbida, sempre desde a tranquilidade.

-Polo que di parece que está de acordo en buscar outra saída para estes rapaces.

-É que estamos falando dunha proba que no 2017 aínda vai ter carácter experimental, falar en abstracto non ten sentido. E a FP básica é unha boa modalidade de FP, no sentido de que forma aos alumnos que teñen máis necesidades de aprendizaxe.

-Este ano por primeira vez os mozos de 4º da ESO deben escoller entre un curso orientado ás ensinanzas académicas ou aplicadas, pero non todos os institutos ofrecen esa opción ¿como garantir esa elección?

-A maioría dos centros van ter as dúas opcións, e haberá que buscar unha saída para que os alumnos que queiran cursar outra modalidade poidan facelo, pero a sociedade non entendería que para dous alumnos creemos un grupo.

-¿Un rapaz con 15 anos pode decidir xa se se orienta ás ensinanzas académicas ou aplicadas?

-É que non é unha decisión so do alumno, é tamén da familia, e terán que participar titores e profesores.

-¿Hai que racionalizar o calendario das universidades e da secundaria?

-Estamos nun proceso de negociación. Non é unha cuestión fácil porque hai moitísimas variables, pero entendemos que hai que racionalizalo. Temos que buscar un punto de encontro para axustar o calendario pre universitario e o universitario, pero ten unha translación directa moi importante na vida de moitas familias, polo que hai que ter uns certos consensos. Creo que ten que ser unha cuestión xenérica no conxunto do Estado, non é moi serio que dentro de España haxa dezasete calendarios escolares diferentes.

-Pero hai que cambialo.

-Non digo que haxa que cambiar, pero hai que racionalizar.

-¿Introducirase unha semana branca como piden moitos?

-É o que plantexou Cantabria, e alí xerou un enorme debate social con moitas familias en contra. Co cal, isto non é unha cuestión que se poida facer de xeito unilateral e mirando á galería.

-Os sindicatos lamentan que tantos profesores teñan que dar materias das que non son especialistas, as chamadas afíns.

-A calidade da docencia mellorou nos últimos anos, e así o confirman informes como Pisa, polo que dubidar da capacidade e do interese dun profesor que dá unha afín creo que lle fai pouco favor a uns docentes que se esforzan por facer ben o seu traballo, e que ademais o acreditan cos resultados.

-¿Vai haber oposicións no 2017?

-Desde Galicia sempre nos pareceu que a medida da taxa de reposición impulsada polo Partido Socialista era prexudicial, loitamos para que esta taxa se incrementase, e chegamos o ano pasado ao cen por cen. Nese sentido estase traballando como se ten que facer, convocando todas aquelas prazas necesarias.

-¿Haberá entón?

-Ten que haber.

-Aumentaron os concertos en FP este curso, e moitos non entenden que suba o ensino concertado.

-Incrementouse por unha sinxela razón, porque os cursos de FP pasaron a ter dúas mil horas e tamén os módulos da FP básica. Ademais aumentamos seis unidades de educación especial. Entendo que todo o que sexa apoiar a educación especial ou a FP nas marxes legais hai dereito a facelo.

-Podería facerse nos públicos.

-Podería, pero os institutos públicos e concertados forman parte da mesma rede, a rede sostida con fondos públicos.

---

---

---