Carlos Callón: «Non está claro que En Marea sexa receptiva co BNG»

Serafín Lorenzo SANTIAGO / LA VOZ

GALICIA

O cabeza de lista de Nós por A Coruña di que para o Bloque é prioritario analizar os motivos da perda de apoios nos últimos 15 anos

22 ene 2016 . Actualizado a las 05:00 h.

Perfil en alza no Bloque, Carlos Callón aposta por buscar solucións para que o proxecto nacionalista volva sintonizar coa sociedade, pero amósase escéptico sobre a conveniencia dunha alianza con En Marea para as autonómicas. «Tentouse durante seis meses e non se conseguiu», lembra.

-Os resultados das xerais son malos, pero a deriva electoral vén de atrás. ¿Cal é a súa análise?

-Os resultados foron negativos. Continúa un ciclo no que o nacionalismo galego non ten suficiente forza para contribuír ao ben do país, e toca reflexionar. É certo que o contexto destas eleccións non era o mellor, pero o importante é o que estaba na nosa man facer e non fixemos. Os candidatos e a marca nomeáronse 40 días antes. Houbo persoas que despois do 20D me felicitaron porque pensaban que era un referente de En Marea. Pero é un momento de volatilidade. Unha persoa pode votar en eleccións diferentes por distintas opcións.