O presidente da RAG critica a incoherencia dos que gobernan cara ao galego

Alonso Montero cre que «a escola é insuficiente» para que a lingua gañe usuarios e fala dun idioma co «estigma da pobreza»


Redacción / La Voz

A recente enquisa do Instituto Galego de Estatística sobre o uso do galego, na que se debuxa un retroceso no uso do idioma, especialmente entre os máis novos, preocúpalle ao presidente da Real Academia Galega, Xesús Alonso Montero. Segundo a súa diagnose, que onte explicou no programa Vía V, de V Televisión, con este panorama pouco optimista para a lingua ten moito que ver que «agora a escola é insuficiente, porque a sociedade é un balbordo que come á escola». Con esta metáfora refírese a que os nenos e os mozos estudan e coñecen o galego, pero «van á discoteca en castelán e fan o amor en castelán». Ao seu entender, quizais «se na casa tivesen unha postura de lealdade ás raíces e a transmitisen, non faría falla ser moi persuasivo». Ou, dito noutras palabras, é a sociedade a que ten a responsabilidade de conservar» a fala. «O galego salvarase se a sociedade galega quere», di, porque a institución que preside vela «pola saúde gramatical e semántica da lingua», pero «é a sociedade a que debe velar pola saúde social do idioma».

«Sería moi importante que o idioma da vida sexa o galego», engade o profesor, que continuando coa análise social da situación da lingua asegura que «o galego é un idioma de pobres, ten o estigma da pobreza», mentres que en Cataluña non ocorre o mesmo co catalán porque alí «é o castelán o que ten o estigma da pobreza e a fachenda da riqueza é a do catalán». E aínda outro problema máis relacionado con este: «A xente aquí tamén sabe que os de arriba non son coherentes co que din», referíndose a que moitos dirixentes que en público falan galego non fan o mesmo detrás dos focos.

O presidente da Real Academia Galega referiuse tamén a outra das polémicas dos últimos meses, a decisión de dedicarlle a Filgueira Valverde o próximo Día das Letras Galegas. Sobre este tema recordou que é unha decisión maioritaria do plenario da RAG. Pero ademais deste argumento que, ao seu entender, xustifica por si mesmo a elección, «como cidadán da cultura» tamén pensa Alonso Montero que «hai poucas persoas en Galicia cunha obra tan orixinal, tan sagaz, como Filgueira Valverde», a quen definiu como «un obreiro da causa galega».

A marcha de Ferrín

O responsable da Academia referiuse tamén á marcha do seu antecesor, Méndez Ferrín, de quen lembrou que «dimitiu» e que o fixo, asegura, «facéndose o mártir». Afirmou tamén que Ferrín cobraba «unha notable cantidade como gastos de representación» sen que eses gastos fosen autorizados pola entidade.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
21 votos

O presidente da RAG critica a incoherencia dos que gobernan cara ao galego