Severino Rodríguez, alcalde de Monforte: «A Fegamp podería ser máis incisiva, pero iso tamén é unha responsabilidade de todos»
GALICIA
A plataforma de alcaldes contra a reforma local ten no de Monforte, Severino Rodríguez, un dos seus promotores. Sostén que a razón de ser da fronte é defender os servizos que prestan os concellos e mellorar o seu financiamento. Rodríguez cre que a Fegamp podería ser máis incisiva.
-¿Cal é o obxectivo da fronte?
-Trátase de que os servizos que prestan os concellos se sigan prestando dende a cercanía e coa calidade actual, e non ir na dirección contraria. Se se centralizan nas deputacións, haberá desigualdades. E a nivel de financiamento, a idea é que se traslade aos concellos a xestión dos cartos que xestionan institucións que non son eficaces.
-¿Pensa nas deputacións?
-E na propia Xunta, para que meta as subvencións no fondo de cooperación local, e non teñamos que andar pedindo esmola polas consellerías.
-Pero as alegacións do municipalismo galego á reforma local foron aprobadas por unanimidade de todas as forzas representadas no seo da Fegamp.
-Si, pero unha cousa son as alegacións e outra isto. É un posicionamento rotundo de que hai que cambiar a dinámica.
-¿Non se senten representados pola federación?
-Si, representa a todos os concellos. Plantexamos algo co que creo que tamén están de acordo os alcaldes do PP. Do que se trata é de preservar os servizos e prestalos do mellor xeito posible aos cidadáns.
-¿Botaron en falla unha posición máis incisiva da Fegamp contra a reforma local?
-Si, podería ser máis incisiva, pero iso é responsabilidade de todos. O que non valen agora son as medias tintas.
-¿Sobran concellos en Galicia?
-Igual non fan falla fusións se queren liquidar os que hai.