«Vou propoñer xa reducir a 60 o número de parlamentarios»

Di que Navantia «pode» firmar con Venezuela un contrato para Ferrol


M. Cheda

Núñez Feijoo regresou este xoves dunha xira de sete días por catro países de Sudamérica cuxos froitos defende con enerxía.

-Din os partidos da oposición que foi unha viaxe electoralista, baleira de contidos...

-Tamén me chamaron mariachi cando fun a México e volvín co acordo estratéxico con Pemex para o naval galego. Polo tanto...

-Polo tanto, ¿que? ¿Que trae?

-No institucional, traemos contactos directos cos presidentes de Colombia e Uruguai e co gobernador dun dos estados máis importantes do mundo, o de São Paulo. E, no económico, vimos con toda unha axenda aberta co Ministerio de Industria, Comercio e Turismo de Colombia, cun acordo en materia de pesca importante, e tamén con contactos firmes con Repsol Sinopec, a empresa socia de Petrobras, a quinta petroleira do mundo. Esta mesma mañá falei co seu presidente e mandoume algún documento para iniciar conversas a efectos de posibles ofertas e contratacións no ámbito do naval. E se obteño a confianza dos galegos, na seguinte lexislatura xa adianto que viaxarei máis porque neste momento hai dous obxectivos fundamentais: equilibrar as contas públicas e exportar, vender fóra.

-Do cal se deduce que xa non viaxará máis ata despois das eleccións.

-Non, eu non dixen iso. Se xurde algunha oportunidade interesante antes...

-Desta xira, máis alá de botar esas redes, ¿vén con algunha captura?

-Normalmente, aos países hai que ir varias veces antes de pechar algo e, probablemente, o conselleiro de Industria regrese a Colombia e a Brasil.

-¿Por que non visitou Venezuela, finalmente?

-Porque non era necesario.

-¿Sabe que o día en que vostede tiña pensado aterrar alí, o xoves, había en Caracas directivos de Navantia intentando vender barcos a Hugo Chávez?

-Si, claro, por suposto.

-¿E non facía falla logo a súa presenza alá, apoiando?

-O ministro de Defensa xa se pronunciou en España sobre o tema, co cal era innecesaria a miña presenza alí, que en principio, si, estaba prevista.

-Si, Morenés dixo que Chávez é hoxe un «gran amigo de España». ¿Como se chega a ser iso sendo hai nada un inimigo antidemócrata pseudoterrorista?

-Non pregunte sobre iso, que eu non o dixen. Simplemente digo que podemos prestar servizo ás necesidades navieiras dun país que é Venezuela.

-¿A curto prazo, pode saír algo de aí, de ese «servizo», para os estaleiros da ría de Ferrol?

-Pode.

-¿E como vai o de Pemex, que non termina de cristalizar?

-Pemex xa está neste momento analizando as ofertas do sector naval galego para un contrato de ata 700 millóns de dólares. Supoño que, a partir de setembro, as terá avaliado, examinado.

-Falando de futuro, ¿teno Novagalicia Banco?

-Si. Galicia pelexa por el.

-¿Como o ve dentro dun par de anos: liquidado, absorbido, en solitario como quere...?

-Se me pregunta hai dous anos o que ía pasar hoxe, sería difícil que acertara, ¿non? De momento, traballamos para salvar unha entidade con sede e domicilio fiscal en Galicia. Hai 14 comunidades autónomas que non pasaron da primeira rolda. Nós estamos na última e espero e desexo que a superemos.

-¿Pon a man no lume?

-Hoxe hai uns bos profesionais á fronte do banco.

-¿Como cualificaría a xestión dos anteriores, a de Méndez e a de Gayoso?

-Fixeron un bo traballo durante un tempo e non estiveron á altura das circunstancias ao final. Houbo, a partir do 2007, probablemente algo antes, políticas erráticas: unha expansión irracional da rede de oficinas, políticas de retribucións absolutamente impropias dunha caixa, investimentos especulativos...

-¿Comparecerán os dous ante o Parlamento galego?

-Si, seguro. E alguén máis.

-¿Quen?

-Xa se verá.

-¿E cando exactamente?

-A comisión aprobarase antes do novo período de sesións no Parlamento e comezará a traballar a partir de setembro.

-Nun Parlamento de 75 deputados. ¿Ata cando?

-Vou a propoñer a todos os grupos da Cámara, ademais dunha rebaixa drástica das subvencións aos partidos políticos, de polo menos o 21 %, reducir o número de parlamentarios. Se pedimos esforzos aos cidadáns e aos funcionarios, teñen que ver que nós tamén os facemos.

-¿Reducilos ata cantos: 60?

-Si, nese entorno.

-¿E cando?

-De inmediato, xa.

-De inmediato tamén debería Rajoy poñer data ao AVE...

-Estou convencido de que esta situación dramática que vive España non impedirá ao presidente cumprir a palabra que me deu e autorizou a comunicar. O que si lle podo asegurar é que, o mesmo día que nomeou á ministra de Fomento, lle encargou a finalización do AVE galego.

-¿Con Ana Pastor fala?

-[Rindo]. Por suposto. Varias veces ao mes e, en ocasións, á semana. Hai tres días falamos.

-Ela con Abel Caballero non se leva mal de todo. ¿Vostede?

-É moi difícil levarse ben cun señor que non se leva ben con ninguén. A miña relación institucional é con Vigo, non con el.

-¿Sairá adiante a área metropolitana de Vigo, si ou non?

-É unha lei democrática histórica que ten que saír adiante.

-Afirma Xosé Manuel Baltar que vostede sabe que, cando el fala, fala todo Ourense.

-Baltar é o presidente da Deputación de Ourense e, cando fala, sen dúbida algunha, fala a provincia.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
61 votos

«Vou propoñer xa reducir a 60 o número de parlamentarios»