Escribo estas liñas antes de comezar a fin de semana, que desta volta está claramente marcada por celebrarmos as nosas letras, o noso idioma e a nosa cultura.
En Burela contaremos coa presenza de varios centos de palilleiras, presenciaremos ós nosos veciños e veciñas que están chamados a participar nas eleccións lexislativas de Cabo Verde e celebraremos co Mago Antón 50 anos de maxia.
Pero se algo temos na cabeza, se algo nos ten dende fai días espectantes é o partido deste domingo ás seis da tarde na Marosa.
O colectivo máis antigo da vila, que vai facer xa 60 anos, xógase a permanencia en Preferente Galicia. Un grupo de rapaces, estudantes e traballadores, liderados por un equipo directivo exemplar na xestión e cun proxecto xenial.
Se non se consegue o obxectivo non vai pasar nada, o proxecto segue en Primeira Galicia. A veciñanza de Burela seguiremos sentindo este tremendo orgullo que temos polo grupo de rapaces e rapazas que forman esta familia que temos na Marosa.
O que de verdade está en xogo é ver que é posible este modelo de xestión deportiva, que compite con equipos con moitos máis medios e recursos. Que é posible estar en Preferente con chavales que non cobran un peso fronte a planteis de categoría incluso superior que se moven de xeito lícito polo que cada club lles pode aportar economicamente. Máis deporte afeccionado e de base, máis SD Burela.
Un exemplo no que deberan mirarse outras institucións deportivas, algunhas delas con serios problemas.
Todos á Marosa!!! Arriba Verdes!!!!
Mario Pillado é tenete de alcaldesa e socio familiar da SD Burela.