Unha novela, un disco e as «Memorias dun neno labrego» levadas ás táboas por Cándido Pazó están entre as propostas do escritor e editor
17 jul 2026 . Actualizado a las 05:00 h.
SÉS
«Nadando na incerteza»
Hai tempo que sigo a esta muller. As voces femininas enriquecen extraordinariamente o panorama musical galego. Escollo a Sés pola súa frescura, polo seu talante, polo seu talento, pola súa personalidade en directo, pola frescura e intención das súas letras, pola capacidade para introducir novas formas, novos recursos, mesmo novos xéneros. Nadando na incerteza é a súa última produción, quizais a máis ambiciosa: un libro-disco, acompañado de letras e fermosas fotografías.
«Memorias dun neno labrego»
As táboas de Pazó
Non vou descubrir agora a Cándido Pazó, a quen sigo e admiro dende hai anos. Mais a produción que como actor e director presenta das Memorias dun neno labrego, a novela de Neira Vilas levada ao teatro, merece toda a nosa atención. Non é cousa doada levar á escena a historia do neno Balbino, un libro que está na memoria de case todos os galegos e galegas. Sen renunciar mesmo a achegas propias para definir o personaxe, Cándido Pazó consegue emocionarnos coa mesma intensidade que a obra do escritor de Gres.
Begoña Caamaño
«Circe e o pracer do azul»
Dende o primeiro momento que chegou o orixinal mecanografado ás miñas mans souben que aquí había unha novela diferente. E unha escritora diferente. Coñecía a Begoña dende os seus primeiros días como xornalista. Cando me enviou a novela para que considerase a súa edición, quedei impresionado. E sigo pensando que é un dos grandes títulos da narrativa galega contemporánea. A visión renovada dos mitos clásicos (homéricos) dende a perspectiva da muller. A historia pode escribirse e contarse doutra maneira.
«Sirat»
Obra de arte de Oliver Laxe
Unha obra de arte que non deixa a ninguén indiferente. Ou estás con ela ou non estás. O cinema é unha linguaxe, unha proposta para entender o mundo, unha vía de coñecemento, como toda creación artística. Oliver Laxe lanza unha proposta sen concesións, orixinal, non convencional. Interésame a súa dificultade e a súa ollada distinta sobre o mundo e mesmo sobre a condición humana, realizada dende a diversidade, coa forza impresionante das imaxes e unha historia que apenas necesita palabras para chegar ao espectador.
«José Freixanes. Eternos son os soños»
Unha antolóxica de José Freixanes
Do o 23 de xullo ao 27 de setembro no Edificio Castelao do Museo de Pontevedra: José Freixanes. Eternos son os soños. Obra pictórica 2006-2025. Unha viaxe polos vinte derradeiros anos de produción, comisariada por Xosé Luís Canido, quen acompañou o artista en instalacións moi diversas: Damasco, Casablanca (Marrocos), o Museo do Mar de Vigo, San Domingos de Bonaval… Completarán a mostra varios catálogos e mesas redondas. Jose sentíase moi feliz neste encontro que programaba a súa cidade natal.