Hoxe podería semellar doado -que tampouco o é- pero alá polo 2011 propoñer facer un festival exclusivamente con grupos que canten en galego era pouco menos que unha tolería. Pero se hai algo que motive a Marcos Rivas, propietario da sala Karma e organizador do festival Surfin' the Lérez, son as tolerías. Así que, sujétame el cubata, alá imos. E mira ti por onde, xa estamos na decimoprimeira edición do Galegote Rock e nun contexto sensiblemente distinto respecto á música no nos idioma de aquel do que partiu a inciativa.
Con todo, o Galegote non variou sustancialmente a súa proposta. Segue a apostar por dar voz e prestar escenario a bandas emerxentes -algunhas das que o eran nas súas primeiras edicións hoxe están máis que consolidadas- e aderezalo coa presenza, sempre docta e oportuna, de ilustres nomes da nos música.
É o caso deste 2022, no que como principal novidade, superadas as restricións impostas pola pandemia, o Galegote retorna aos bares, como espazo natural da música en directo. Sen por iso deixar des estar presentes nalgunhas emblemáticas prazas de Pontevedra.
O festival arrancou onte con sendos concertos de High Paw e Copa Turbo. Hoxe venres será o turno de Os Silvestres, o novo proxecto de Roger de Flor (O Diaño, 20.30 h) e de Ruxe Ruxe, que por fin están a celebrar como corresponde o seus 25 anos de traxectoria (Karma, 22 h).
A xornada do sábado arrancará ás 12.5 h coa banda coruñesa de rock sureño Moucho, no Tábula Rasa. O repertorio en galego de Eladio y los Seres Queridos poderase escoitar no Campiño de Santa María ás 13 h. Pola tarde será a quenda de Xeración Sónica, un proxecto nacido no estudo Bonobo que reúne a rapaces e rapazas de 13 a 16 anos (O Campiño, 17 h). Sucederanlle os sons apegados á terra e ás súas lendas que propoñen Zeltia e Irevire (O Diaño, 18.30 h) e o grupo de «rock portátil, pop campestre e folk psicodélico» Grampoder (El Pequeño, 20 h). O encargado de rematar a programacións de directos será Berto, quen na sala Karma, a partir das 22 h, presentará o seu recente traballo, Bailar Chikito, para o que conta coa colaboración de Marinha, a cantante de Furious Monkey House.
Outra novidade desta edición é a programación, o sábado, de dúas sesións de Dj's con música en galego. Unha delas estará centrada no rock (El Pequeño, 00 h) e na outra Kris K Dj fará un set 100% en galego e 100% con voces femininas (praza García de la Riega, 14.30 h).
A entrada, tanto para os concertos como para as sesións dos Dj's, é gratuíta ata completar o aforo.
- PONTEVEDRA VARIAS SALAS E PRAZAS VENRES E SÁBADO GRATUÍTO