A banda publica un adianto do seu novo disco, un tema con vocación de himno e cun videoclip no que participan 80 grupos e artistas galegos
30 dic 2021 . Actualizado a las 07:59 h.Un conclave único, inédito e dificilmente repetible, formado por 80 grupos e artistas galegos corea: «Somos un pobo de artistas / e traemos unha mensaxe, / sempre contra o poder / non nos van facer desaparecer». Deste xeito comeza o videoclip de Pobo de artistas, a canción que a modo de adianto do seu vindeiro disco veñen de publicar Dakidarría.
Aínda que é a banda do Val Miñor a que asina o tema, en realidade é unha composición coral que reivindica precisamente a colectividade e a unidade entre os músicos galegos. «Facernos fortes sendo comunidade», explica Gabri, vocalista de Dakidarría.
Conta o propio Gabri que a idea de facer este tema xurdiu «para homenaxear e animar ao colectivo de músicos do país, que fomos os primeiros en parar e non acabamos de volver nunca». A partir de aí xurdiu a idea de plasmalo tamén en colectividade. «Empezamos a chamar e a explicarlle á xente o que tiñamos en mente e a resposta foi brutal. Das bandas ás que chamamos asistiron o 80 ou o 90 %, e os que non viñeron foi porque tiñan traballo ou ese día lles era imposible».
O resultado final é un emotivo, intenso e vibrante videoclip de case seis minutos no que os músicos percorren as rúas de Bueu para rematar nunha festa colectiva rexistrada no Aturuxo, o templo da música en directo do Morrazo.
O vídeo é en si mesmo un reflexo da efervescencia da actual escena musical galega e da súa pluralidade. Por alí asoman Tanxugueiras, O Ravelo, Ezetaerre, García Mc, High Paw, Mounqup, O Sonoro Maxín, Festicultores, Pauliña, Rebeliom do Inframundo, Wöyza, Zeltia Irevire... Así ata 80 bandas e artistas. «Hai dez anos sería impensable ver tanta variedade musical en tantos proxectos en Galicia. E a maioría en galego, ademais», expón Gabri. «Hai música en galego de todos os estilos, cun criterio de calidade moi alto. E iso tamén hai que resaltalo. Aquí temos un cravo ardendo onde agarrarnos».
A canción comeza e remata coa mesma declaración de principios: «Non nos van facer desaparecer». O vocalista de Dakidarría explica a razón. «Nós temos a sensación de que a cultura galega leva sendo perseguida dende hai moitos séculos, pero sempre soubemos rexurdir. E iso é un pouco o que cantamos. Con esta realidade musical que temos no país vai ser difícil que nos fagan desaparecer. E máis se estamos orgullosos de nós mesmos e somos conscientes de que somos unha piña e de que todos estamos ao mesmo».
O primeiro paso está dado e rexistrado. E outros máis veñen en camiño. «Agora mesmo, detrás de Pobo de artistas tamén hai un grupo de WhatsApp xigante no que falamos e compartimos as nosas cousas e no que xa se están propoñendo ideas que poden chegar a saír adiante».
Pobo de artistas é o primeiro adianto do novo disco de Dakidarría, que verá a luz o 25 de febreiro. «Titularase Collage —adianta Gabri— porque nel están representadas as distintas vertentes musicais das que fomos bebendo durante os nosos 18 anos de historia. Concibímolo como unha homenaxe á nosa carreira e a esas diferentes subculturas ás que nos fomos achegando».
É Pobo de artistas unha canción con vocación de himno?, pregúntolle ao vocalista. «Si, pode ser. Pode ser o himno deste momento musical do país. E ao ser cantado por tanta xente xa evoca un himno, non?». Pois si, claro que si.