Cando Xela Arias ía pensando na revolución

«Non te amola!», ilustrado por Luz Beloso, é unha celebración da creatividade da autora homenaxeada o Día das Letras

O libro foi presentado en Vigo polo fillo de Xela Arias. Na imaxe, Luz Beloso, Darío Gil Arias e Francisco Castro
O libro foi presentado en Vigo polo fillo de Xela Arias. Na imaxe, Luz Beloso, Darío Gil Arias e Francisco Castro

Foron escasas as mostras narrativas que Xela Arias deixou dispersas e non se prodigou neste xénero polo que supón unha regalía a posibilidade de acceder a esta mostra creativa que ve a luz postumamente.

Non te amola!, ilustrado co estilo propio que exhibe Luz Beloso e afeitos ás claves estéticas que rodean a súa obra coñecida, é unha mostra palmaria da súa versatilidade creadora ao atopar un exercicio no que, grazas a unha álter ego, voltea boa parte da súa memoria persoal nun libro senlleiro e dominado por un afán de verosimilitude expreso no emprego dun rexistro fluído. É aí onde agroma unha protagonista que, malia a súa curta idade, apoiada sempre na ironía e nunha argumentación tantas veces esmagadora, deseña un universo persoal conformado pola contorna familiar e a experiencia do abandono do mundo rural de Ortoá ata radicarse noutro urbano con apenas nove anos.

Hai, nestas páxinas unha defensa explícita do mundo dos libros -porque serven para «cambiar as cousas»- e da lectura malia amosarse máis crítica co papel dos que os inventan, aínda que este asunto axiña ceda o paso ás vivencias persoais onde a presenza dos avós e doutros familiares talvez sexan as páxinas máis conmovedoras, pois aí relata como descobre o mundo, como aprende a lle chamar ás cousas e aos animais polos seus nomes e desvela as razóns polas que a imaxinación, a fabulación, a loita polo que se cre xusto, a ansia de ser independente e a importancia de saber oír son algunhas desas cousas que resultan tan importantes para a vida; sen esquecer inquirirse polo futuro dunha nena que quería alentar nun mundo igualitario polo que xa, tan nova, ía pensando na revolución para conseguilo. Imprescindible.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Cando Xela Arias ía pensando na revolución