Cal é a palabra galega máis bonita?

Esfollamos a margarida cos lectores para celebrar botando a lingua o noso Día das Letras. Nós preguntamos e eles responderon con xeito, troula, agarimo e bolboretas

«Bolboreta», «morriña», «agarimo» e «colo» son algunhas das palabras galegas escollidas polos lectores que participaron nunha enquisa na web do xornal. 
Na foto de arquivo, nenos e nenas celebrando as Letras Galegas
«Bolboreta», «morriña», «agarimo» e «colo» son algunhas das palabras galegas escollidas polos lectores que participaron nunha enquisa na web do xornal. Na foto de arquivo, nenos e nenas celebrando as Letras Galegas

Pode que sexa a única lingua que fai sentir bolboretas nos beizos. A única na que o colo presta máis, e queda máis arriba, que o regazo da nai. Ten nai, e naiciña, e mamaíña. Como ela, non hai ningunha, non a hai. Ten máis xeito que as boas maneiras, un son longo de axóuxeres para non chorar, riquiños e larpeiros a esgalla, amoriños, e rabudos e pelouros, e agarimo ata para dicir miñaxoia (apoucado, coitadiño), lambecús (lambecribas val tamén). Como xa o sabes, heicho contar...

Para celebrar o maio máis estraño das Letras Galegas, dende o Fugas lanzamos a pregunta na Rede, guindando a moeda ao ar. Cal é a palabra máis bonita do galego? A máis feitiña para nós?

As grandes favoritas

Hai prebe, mollo, chorume, a salsa da variedade na escolla dos lectores de La Voz de Galicia. Coa enquisa que se fixo a través do diario online, pechada a 14 de maio, os resultados coroan unha favorita que vén de lonxe, con dúas grafías: bolboreta e volvoreta, singular e plural. A primeira é a forma correcta, a que inclúe o Dicionario da Real Academia Galega, pero non lle imos facer o feo aos que prefiren ir por libre polo uve. Máis de 500 persoas responderon na web. Delas, 36 escolleron bolboreta como a palabra máis bonita, e outras 25, volvoreta. Fagan o plural, que senta ben.

Se sumamos as bolboretas e as volvoretas, o insecto que chucha o néctar das flores (e cando é nocturna convértese en avelaíña) é o que gaña no corazón, ou na preferencia da lingua, dos galegos.

Esta escolla bolboreteira revela que somos poéticos e diversos, naturais e voadores de espírito, non é? E cando imos, sempre, sempre, pensamos en volver. A morriña (36 votos) é a segunda raíña da lingua para os lectores vendo as respostas á consulta polo Día das Letras, e a saudade está tamén entre as favoritas, co aguillón de nostalxia polo que se quere ben. Con ese eñe noso que fai máis doado o camiño hai moitas elixidas para o cesto das lindas: aloumiño, muiñeira, riquiña e riquiño, anduriña, avelaíña e ruliña son só algunhas. Sempre con sentidiño, amodiño... que non faltan á hora de facer un top con xeito. O xeito... como non ía estar entre o dicir ben? Tamén fican o agarimo, o colo (que, por certo, é a palabra galega favorita do actor Javier Gutiérrez), a ledicia, o axóuxere e o bico.

O enxebre leva o seus votos, e o amorodo. O lambecús tamén, que, como palabra, fea non che é... Como carraxe, sempre que non nos cegue o corazón.

Meiga, aperta, berce, fogar, esquío, bulebule, orballo, agasallo, afouteza, brétema, parrulo, luscofusco, solpor, xoaniña, vacaloura... fan unha hortiña léxica do mellor do mellor. Todas elas botan a lingua con gusto, están entre as favoritas polo sabor, polo gusto de pronunciala.

Que non falte o sexto sentido do humor. Trapallada ten o seu aquel, e os seus votos na Rede, e a troula tamén. Outra cousa é a esmorga de Blanco Amor. Tamén o toxo enfeitiza, dá flor! Nas redes sociais é outra leria escoller... A margarida da lingua non se dá esfollado, ho.

E se empezamos cos ditos, xa non cho dou en contar. Temos moito conto, pero este xa é outro cantar...

A palabra máis bonita? Depende, non?

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
18 votos
Tags
RAG
Comentarios

Cal é a palabra galega máis bonita?