O xogo das diferenzas

Diego Giráldez ofrece na súa primeira novela, «Hotel para coleccionistas discretos», unha proposta que se afasta do convencional


Hai tres anos Diego Giráldez publicou Galería de saldos, un conxunto de relatos que gozou dunha recepción moi positiva en todos os ámbitos. Arestora dá a coñecer a súa primeira novela -Hotel para coleccionistas discretos-, que, desde o seu título, abraza tres referencias expresas que nos sitúan no seu nó argumental: un espacialmente impreciso Hotel Continente que acolle un congreso de coleccionistas moi particulares cuxo trazo común é o do coleccionismo antolladizo, sen esquecer o elemento da discreción como trazo condutivo en cada un deles, malia que o verdadeiro nexo de unión que amosan sexa o da desaprehensiva e impúdica exhibición do poder.

Giráldez segue a cultivar, ao meu ver, propostas que se afastan do canónico e do convencional. Esta novela, que só en aparencia pode semellar un delirio pois o humor e a ironía que a dominan activan os elementos distanciadores e críticos coas situacións e personaxes que a poboan, deseña unha visión esperpéntica e raiana co grotesco de xinea valle-inclaniana, á que engade un ritmo vertixinoso ao envolvernos nunha coralidade patente de voces diversas e individualizadas nas dúas primeiras partes da novela, en moitas ocasións á procura dun recorrente e efectivo contraste, e un narrador omnisciente que nos guía con pulso firme ata a conclusión.

A instancia autorial talvez vai máis alá do que se atopa na superficie para adentrarnos tanto nos difusos límites do poder como no grao de submisión que nos rodea. Mais a esta, e a outras moitas cuestións, non se ofrece unha resposta contundente, talvez porque na realidade non a haxa. Os máis dos personaxes mergúllanse nas súas sorprendentes e singulares psicopatías, descritas cun natural hálito ridiculizador que os converte en arquetipos válidos que demandan a procura do seu espello nun tempo actual a pouco que nos esforcemos por seguir o xogo de descubrir as diferenzas..., ou as semellanzas!

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O xogo das diferenzas