Bieito Romero: «Na Ribeira Sacra descubrimos un gran tesouro musical»

Ourense acolle a estrea da xira do novo disco de Luar na Lubre, «Ribeira Sacra», que propón un singular arquivo sonoro do patrimonio da zona e no que suman múltiples colaboradores nun avance da marcha de Belem Tajes. Mañá e domingo actúan no Teatro Principal de Ourense


Luar na Lubre fai en Ribeira Sacra unha especie de cápsula sonora con recollidas de campo de elementos etnográficos que resumen o sentir dun lugar igual de gabado que descoñecido e que eles musican mesturando tradición e creación. Na estrea do seu 18 disco acompañaranse de numerosos colaboradores, como Víctor Manuel, Sés, Nani García, a Coral de Ruada, Marisa Valle Roso, Irma Maceiras ou Juan Antepazo e Carlos Gardón de Astarot. Bieito Romero (A Coruña, 1964) recoñéceo como o seu traballo máis ambicioso e o prólogo dunha nova etapa.

-Reivindica Ourense por tradición familiar.

-De alí son as miñas vivencias de cativo, de Niño de Aguia, e fágoo porque forma parte das miñas raíces. A idea do disco fíxoa Maruchi, a nosa manager, e nin se me ocorrera, porque é unha zona onde non hai demasiados datos sobre a música tradicional. A Ribeira Sacara son 24 concellos e abarcar todo era complicado. Fixémola exclusivamente da parte ourensá, porque era a que coñeciamos máis.

-O máis singular da proposta, se cadra, é o arquivo sonoro que inclúen.

-Había detalles sonoros ambientais noutros traballos, pero aquí é dun xeito máis conceptual e directo. Fixemos un traballo de campo importante, estivemos con xente descubrindo un verdadeiro tesouro da musica tradicional, e consideramos que os sons que rexistramos de amenceres, dos felos, do carro do país, todas estas cousas, tiñan entidade propia e puxémolas en relación coas pezas. A aposta é grande, presentamos 15 cancións e 11 sonoridades.

-Con «Alento», que fala dos lumes, vólvense reivindicativos.

-En todos os discos hai algún toque, neste caso fixémolo porque as primeiras tomas e gravacións sucederon cando a traxedia dos incendios, nós estabamos no mosteiro de San Pedro de Rocas, en Esgos, e había unha néboa basta de fume e foi unha cousa que nos tocou na alma, e a peza é unha mestura do que sentimos nós e a nosa colaboradora Raquel González Ramallo, que viviu a traxedia en Vigo, cos caldeiros, e viu como entraba o lume na cidade.

-Por que unha proposta tan coral para presentalo?

-É un disco moi diferente e pensabamos que é unha maneira de enriquecer o traballo, son voces que admiramos o interesantes para a proposta.

-Saen de xira xa con 30 concertos confirmados.

-Hai unha boa xira e estanse pechando moitas cousas aínda, o grupo está con moi bo estado de saúde e de ánimo, e ten boa acollida.

-Cando confirman o cambio de cantante?

-Despois de Ourense, son cousas que son habituais dentro de Luar na Lubre. Belem foi unha colaboradora que estivo durante un tempo e gravou algo neste traballo, e agora toca outro tempo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Bieito Romero: «Na Ribeira Sacra descubrimos un gran tesouro musical»