O amor e as súas anacronías

Francisco Castro volve transitar cunha ficción que se asenta no territorio das relacións sentimentais e faino cuestionando con solvencia os piares do chamado amor romántico


Pode resultar doado construír hoxe en día unha novela sobre o amor, ou talvez non, aínda que o díficil sempre será aproveitar os alicerces desa historia para albiscarmos a onde nos leva perpetuar determinadas crenzas xeneralizadas que teñen efectos perversos. Sobre este asunto, e outras cousas, ideou Francisco Castro unha proposta verista e contemporánea onde as vidas de dous personaxes -Carla, unha muller que sacrificou todo por nada, e César, un enigmático fotógrafo-, conflúen inesperadamente tras a aparición na casa da primeira dun cadáver, o que a vai abeirando aos poucos cara a unha tonalidade de corte detectivesco.

Con todo, talvez os devanditos Carla e César, a carón doutras presenzas, non constitúan o foco central desta historia pois, ao meu parecer, o protagonismo repousa na voz narrativa, envolvente e cativadora, case un demiúrgo: ela é quen nos conduce, marcando o ritmo acaído nos capítulos que son torrenteira e noutros de intensidade máis apracible, alí onde exactamente quere que nos situemos, isto é, fainos vivir arreo no mundo das conxecturas para desviarnos ou aproximarnos á resolución do enigma final, sempre sometidos á súa vontade. Por ela sabemos, claro é, o que os personaxes din, revela o que tanto Carla coma César pensan e, por veces, os recrimina, aconsella, comprende ou deixa en evidencia. Aínda máis, esa voz fai máis transparente o lene fío que separa a vida da morte e, sobre todo, exhibe as razóns da resistencia dese concepto anacrónico, pero aínda tan presente, do amor romántico. Nesa voz agroma, ás veces, o profesor de filosofía que o autor non deixou de ser, que abraza a ironía cando é preciso e nos conduce a que o relevante é aprender, se non se sabe ou se non se puido saber, a sentir.

Amor é unha palabra coma outra calquera. Novela. Francisco Castro. Galaxia. 224 páxinas. 17 euros

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

O amor e as súas anacronías