Destaca as experiencias que iniciaron os últimos anos, algunhas pioneiras
17 ene 2015 . Actualizado a las 05:00 h.Xosé Ramón Carril, docente do López Ferreiro desde o ano 2003, asumiu este mes a dirección deste colexio público. Colaborou estreitamente con Lois Trigo, o seu antecesor, na responsabilidade do departamento de dinamización lingüística, e foi xefe de estudos os tres últimos cursos,
-Dirixe un centro fundado en 1849 como parte da USC, ¿que resta diso?
-Recibimos documentos onde se lle chama ao centro Escola de Prácticas ou anexa; aínda que temos aprobado o cambio de nome oficial, pois deixamos de ser escola prácticas de Maxisterio da USC hai moito tempo. Até hai 8 anos, cando se reformou o colexio, participábamos de algún servizo común con Enfermaría e Ciencias da Educación, arquitectonicamente estábamos moi condicionados. Agora mesmo, a maior relación é que, por proximidade, veñen facer prácticas estudantes de Ciencias da Educación, e nós utilizamos algunhas veces as súas instalacións. E docentes desa facultade son xurado do noso concurso Falemos da nosa historia.
-¿Ten continuidade o concurso?
-Ten. Este curso convocamos xa a undécima edición, sobre o oitavo centenario de San Francisco de Asís. Tamén estamos a ultimar a edición dos traballos gañadores nas dez primeiras edicións.
-Este curso o centro ten tres aulas de 3 anos, ¿pensan consolidar unha terceira liña?
-Non temos espazo para iso. Esa terceira aula foi aprobada porque había moita demanda de alumnado da nosa zona. Terá continuidade só para este alumnado.
-Tamén estrean o libro dixital, ¿como resulta?
-Si, iniciamos a experiencia, en quinto de primaria. Comezamos con dificultades para o acceso a materiais didácticos, que se foron superando.
-¿Influirá no futuro na aprendizaxe da forma de escribir?
-Consideramos que a escrita manual en papel non se pode esquecer, é importante para aprender tamén mellor a ortografía, e ten outras vantaxes.
-Foron centro pioneiro en adiantar o ensino do inglés, ¿están satisfeitos da experiencia?
-Adiantamos o inglés para alumnado de 3 anos, e música en inglés; quixemos ter tamén música en francés, e non nos autorizaron. Fomos o único centro galego onde viñan facer prácticas estudantes de maxisterio ingleses, até hai tres anos. Sempre se lle deu importancia ás linguas estranxeiras e mesmo elaboramos unha gramática de inglés para galego-falantes.
-¿Como é a comunidade educativa?
-Ten unhas características sociolóxicas moi peculiares. Fixemos un estudo e hai moita presenza de familias de funcionariado, docentes, e autónomos e profesionais liberais, que se implican moito na educación dos fillos e demandan máis atención e prestación de servizos que noutros centros. Iso explica algunha peculiaridade, como ser o único colexio de Santiago con cociña propia, e un comedor ben xestionado pola asociación de nais e pais. A sintonía é moi boa.
-¿Ten novos proxectos?
-De momento, dar continuidade á boa traxectoria dos últimos anos, pois aquí comezamos outras experiencias interesantes, algunhas hoxe xeneralizadas, como o préstamo solidario de libros entre o alumnado, e outras. Por iso se aumentou a 19 aulas e 462 escolares; e xa nos chegan solicitudes para o próximo curso, cando aínda non comezou o prazo; vemos que a xente anda detrás do colexio.
XOSÉ RAMÓN CARRIL NOVO DIRECTOR DO COLEXIO PÚBLICO LÓPEZ FERREIRO
«Comezamos co libro electrónico con dificultades, que se foron superando»