Ramón Caride: «Hoxe poría ao personaxe a loitar contra a corrupción política»


O Capitán Aspanitas ten tamén o seu propio libro. Escribiuno Ramón Caride (Cea, 1957). O Capitán Aspanitas e o misterio das Burgas (Xerais, 2013) tivo unha notable acollida polos pequenos lectores aos que vai dirixido, a partir de oito anos. Para o escritor non era un público descoñecido, xa que entre a súa abondosa obra, hai un capítulo importante, con máis de vinte títulos, de narrativa infantil. Pero, como el mesmo recoñece, si era a primeira vez que se enfrontaba ao reto de escribir un libro por encargo e, por riba, cos personaxes xa definidos: o propio superheroe e catro rapaces que o acompañan.

-¿Cómo foi a experiencia?

-Pois a verdade é que me gustou. Pasáronme o material que tiñan, as curtametraxes de animación e os pequenos anuncios feitos co persoaxe real e eu intentei recoller o espírito de todo ese traballo e crear unha aventura sinxela e ao mesmo tempo interesante de ler. Tamén me atraía o feito de poder ubicar a historia no casco vello, que me parece que é bastante descoñecido, e achegarlle aos pequenos o Ourense monumental e ao mesmo tempo facer unha pequena guía das zonas termais. Motivados polo libro xa estiven con rapaces de Muros e Bertamiráns que organizaron excursións para coñecer a cidade, cousa que me comprace.

-¿Non limita o espírito do creador o traballar con tantos elementos predefinidos?

-Pois por un lado si, pero por outro tamén adiantas traballo. Xa sabes que personaxes hai e o que se trata é de afondar neles. Variei algo a historia orixinal do heroe, que no libro non é un elemento independente, senón que aparece como resultado da confabulación dos catro nenos. Facer o libro foi moi divertido, incluso sóubome a pouco. Chegou un momento que me din conta que xa me pasara de páxinas.

-¿Pensa que é un personaxe que pode dar xogo ós creativos?

-Penso que incluso pode dar unha serie. Ten ese carácter que permite darlle un recorrido, e de feito o libro está funcionando fora de Ourense onde non hai lugares cos que se podan sentir identificados por o tema do termalismo. Eu por exemplo creo que seguiría. Non desboto facer máis aventuras do Capitán Aspanitas.

-¿Por que decidiu ubicar a aventura nas Burgas?

-Para min é sempre moi interesante partir de situacións reais. A literatura sempre permite explicar a realidade. E tíveno claro por que fora ese episodio tan espectacular, cando As Burgas deixaran de botar auga, así que mo puxeron en bandexa.

-¿E onde o colocaría na segunda?

-Ao mellor eu hoxe poría ao personaxe a loitar contra a corrupción, que ademais agora está moi de moda (ri). E a verdade é que non está mal empezar xa a educar nese senso ás novas xeracións dende pequenos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos

Ramón Caride: «Hoxe poría ao personaxe a loitar contra a corrupción política»