A zona podería sumarse a este proxecto de desenvolvemento
15 may 2013 . Actualizado a las 07:00 h.Os municipios de Folgoso do Courel e Quiroga figuran no plan de recuperación do oso pardo que promove a Consellería de Medio Ambiente. Pero aínda que a presenza destes animais está ben documentada neste territorio -incluso con casos de destrozos de colmeas en Quiroga no 2006-, ambos municipios quedaron fora do proxecto Territorio Oso, unha iniciativa que ten por obxectivo fomentar a actividade turística nas zonas oseiras do norte da Península.
O plan Territorio Oso foi impulsado pola Fundación Oso Pardo e conta con financiamento do Ministerio de Agricultura, o Fondo Europeo Agrícola de Desenvolvemento Rural e a empresa Endesa. A área de actuación deste proxecto esténdese por unha serie de zonas pertencentes ás comunidades de Galicia, Asturias, Cantabria, Castela e León, Aragón e Cataluña. Só dous municipios galegos -Cervantes e Navia de Suarna- están encadrados na iniciativa. Por tanto, quedan tamén excluídos os outros catro concellos que forman parte do plan de protección da Xunta ademais do Courel e Quiroga, ou sexa, os de Pedrafita do Cebreiro, Samos, Triacastela e Negueira de Muñiz.
Segundo explican desde a mencionada fundación, a exclusión destes municipios débese unicamente a que cando se trazou o proxecto, no 2009, ningún deles estaba considerado como zona de protección de osos. Só Cervantes e Navia tiñan por entón esa categoría. Os promotores engaden que se optou por actuar unicamente nas áreas oficialmente protexidas para non complicar demasiado o proxecto, que requeriu un traballo intenso de busca de empresas dispostas a sumarse a esta iniciativa.
Non obstante -engaden desde a fundación-, o proxecto segue en marcha e non se descarta a posibilidade de amplialo a outras zonas que tamén teñen agora a categoría de área de protección de osos. Iso dependerá de que o soliciten os concellos e as empresas locais.