«Son un gran fan do Ecce Homo, calquera ten dereito a ser artista»

Recoñece que a súa maior aspiración é poder vivir da arte


ribeira / la voz

Nomeado pola prensa como o Andy Warhol Barbanzano, Manuel González, coñecido na arte como Manu Mimé, é un dos maiores expoñentes artísticos da comarca. El mantén os pes sobre a terra. Sabe que o mundo da arte é un terreo pantanoso, onde é moi complicado andar sen meter a zoca. Iso si, non para, seguirá loitando ata que a arte se converta no motor da súa vida.

-¿Cando empezaches a pintar?

-Foi algo innato, dende neno sempre tiven a idea de plasmar a realidade que me rodeaba. Logo, a partir da adolescencia, había cousas que eu vía e que tiña que dicir dalgunha maneira. Atopei nas artes plásticas a mellor forma de expresarme.

-¿Cando empezaches profesionalmente?

-Foi cando comecei a estudar belas artes, dinme de conta de que nacera para isto, que era ao que me debía dedicar. Estou rodeado todo o día de arte, tanto dunha maneira produtiva como teórica. Atopo noutros artistas o que eu quero dicir, aprópiome deso e intento plasmalo segundo o meu estilo artístico.

-¿Como definiría o seu estilo?

-Quizás coma unha mestura entre cotián e esaxeración. Busco levar accións cotiás a un expoñente superlativo, darlles un toque de grandeza.

-¿Que mensaxe intenta enviar coa súa obra?

-Busco aportar humor, parodia. Na miña obra todo ten ese aire humorístico e irónico. Sempre busco ese dobre sentido.

-¿Estamos ante un mal momento para os artistas?

-Non hai un momento preciso para ser artista. Para calquera persoa que se considere artista calquera momento é bo. Hai que saber aproveitar as oportunidades que che da cada momento. Antes, en época de bonanza, podías aproveitarte de institucións e das empresas. Hoxe en día é algo máis complicado, impera o «faino ti mesmo». Neste caso a cuestión socioeconómica non ten nada que ver coa artística.

-Parece que o artista necesita pasalo mal para facer o seu mellor traballo...

-Cando estás ao límite é cando xorden as grandes cousas. Se vivimos ben, xa o temos todo, calquera cousa vale, non se valora o nivel da arte. Cando realmente necesitas algo, cando tes que poñer o mellor que tes é cando tes que aumentar o esforzo.

-¿Que opina como artista profesional do Ecce Homo?

-Son un gran fan do Ecce Homo, calquera ten dereito a ser artista. Sei que dende o punto de vista do patrimonio cultural é unha gran perda, pero tampouco esquezo que ata que apareceu a señora Cecilia en acción ninguén lle dera importancia ao patrimonio de Borja.

-¿Cal é o seu maior soño?

-Vivir da arte é a miña máxima aspiración. Crear unha fusión arte-vida.

mANUeL GONZÁLEZ GÓMEZ, «Manu Mimé» ARTISTA

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

«Son un gran fan do Ecce Homo, calquera ten dereito a ser artista»