«O castro de Centroña ten un altísimo potencial como activo turístico»

A Asociación Cultural para a Protección do Patrimonio Ardóbriga leva anos reivindicando a declaración de ben de interese cultural

Imaxe aérea do castro de Centroña tomada polo voo americano de 1956
Imaxe aérea do castro de Centroña tomada polo voo americano de 1956

PONTEDEUME / LA VOZ

Os contactos do Concello de Pontedeume cos propietarios de parte dos terreos do castro de Centroña (ou de Castrelo) para a súa adquisición constitúen un paso importante para a posta en valor dos vestixios arqueolóxicos e a posterior declaración de ben de interese cultural (BIC). Estes son os obxectivos prioritarios da Asociación Cultural para a Protección do Patrimonio Ardóbriga desde a súa fundación, no ano 2008. «De feito -sinala o presidente, Antón Prego-, o noso símbolo é o torque de Centroña, que apareceu nas proximidades do castro no ano 1912; e o nome, Ardóbriga, sería o dunha cidade situada a carón do monte Breamo, aínda que isto é máis unha hipótese, a partir dunha teoría dun historiador romano que fala das cidades do golfo ártabro».

O colectivo apoia a iniciativa do Concello eumés, pero advirte de que «hai que facer un plan director das actividades que se vaian levando a cabo, para que todo estea ben planificado por arqueólogos e historiadores, non poñerse a escavar sen criterio», remarca Prego. Incide, ademais, en que calquera acción deberá estar coordinada polos dous concellos nos que se sitúa o castro, repartido entre as parroquias de Centroña (Pontedeume) e Perbes (Miño). Subliña o valor patrimonial do xacemento «e o altísimo potencial que ten como activo turístico; simplemente con mantelo limpo xa se perciben as estruturas e os parapetos, e permitiría organizar excursións e rutas».

Proxección hipsométrica do castro de Centroña, na que se obxervan as estruturas e a división entre os dous municipios
Proxección hipsométrica do castro de Centroña, na que se obxervan as estruturas e a división entre os dous municipios

A localización «é espectacular, xusto no saínte que separa as rías de Betanzos e Ares, dominado polo monte de Breamo, onde había un santuario precristián», describe o presidente de Ardóbriga. «O dominio visual abarca desde a torre de Hércules ás illas Sisargas: A Coruña, Ferrol, toda a entrada do golfo ártabro... Tiña que ser un castro importante, analizando a arqueoloxía da paisaxe, xa sen facer escavacións -conclúe-. E que aparecera un torque de ouro, que é un símbolo de soberanía...». A entidade leva anos reivindicando a declaración de BIC e divulgando o castro en charlas e publicacións. «Ten un potencial descoñecido para a xente da contorna. Algúns foran connosco a unha excursión ao Museo de Lugo para ver o torque, e ao parar no castro de Viladonga alucinaron. Diciámoslles: “isto tédelo alí a carón das vosas casas”, “non sabedes o que tedes”», conta Prego.

Conoce nuestra newsletter con toda la actualidad de Ferrol

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
1 votos
Comentarios

«O castro de Centroña ten un altísimo potencial como activo turístico»