Opinión 25 artigos para entender Galicia

O cruceiro medieval de Neda, o de San Nicolás, símbolo da confluencia dos vellos camiños de peregrinación

ramón Loureiro FERROL / LA VOZ

NEDA

Cruceiro medieval de Neda, unha peza de excpcional valor que ben merecería un estudo en profundidade, desde a perspectiva do noso tempo, da súa orixe e da súa historia. Ramón Loureiro

Ao pé del conflúen o Camiño Inglés a Santiago (e, a través deste, o Camiño do Mar), o Camiño de San Andrés de Teixido, o Camiño do Bispo (que vén de Mondoñedo) e o propio Camiño de San Nicolás

31 may 2026 . Actualizado a las 05:00 h.

Podería dicirse, e con razón, que o magnífico cruceiro medieval de Neda, que segundo os investigadores puido ser labrado a finais do século XIV ou a comezos do XV, non sempre estivo ubicado en San Nicolás —alí leva menos dun século— e que, primitivamente, se alzaba no enclavo coñecido como O Paraíso. Pero sendo iso certo, igual de certo é que esa peza extraordinaria, que vén de saltar de novo á primeira liña da actualidade tras anunciar o Concello nedense o seu desexo de impulsar a súa restauración integral, está hoxe nun espazo de especial valor simbólico. Exactamente, onde conflúen o Camiño Inglés a Santiago (e, a través deste, o Camiño do Mar), o Camiño de San Andrés de Teixido, o Camiño do Bispo (que vén de Mondoñedo) e o propio Camiño de San Nicolás.

Sepulcro do Cabaleiro Esquío conservado na igrexa de San Nicolás de Neda. Ramón Loureiro

Unha circunstancia, esta, que neste século novo lle vén dar un valor simbólico aínda maior a unha peza que, coma o cruceiro de Melide, é todo un símbolo da historia de Galicia. Labrado no tempo no que os cabaleiros da Casa de Esquío señoreaban unha terras nas que o norte se fai máis norte aínda, o cruceiro de San Nicolás tamén é, en si mesmo, unha viaxe a través do tempo. E, sobre todo, un tesouro que Galicia non pode esquecer.