O ciclo «Elas» trae ata o Pazo da Cultura ás novas directoras do cinema español

Ao longo do mes de febreiro, as melloras obras das novas directoras do cinema español poderán verse no Pazo da Cultura de Narón. A través do ciclo Elas, proxectaranse catro películas con entrada de balde con horario a partir das 20.00 da tarde.

Segundo adiantaron a concelleira de Cultura, Olga Ameneiro, e o presidente do cineclub Serie B, Alberto Pena, a primeira cita será coa premiadísima Cinco lobitos da vizcaína Alauda Ruiz de Azúa. Ten once nominacións aos Goya, incluídas as de Mellor Película, Mellor Dirección Novel e Mellor Guión Orixinal. «Conta a historia dunha muller que despois de ser nai e ausentarse a súa parella por motivos laborais decide regresar ao pobo dos seus pais para compartir as tarefas e a responsabilidade de coidar ao seu fillo», avanzan dende o Concello. A película obtivo este ano o premio á Mellor Película Europea na XV Gala dos Premios Gaudí da Academia do cine catalán.

«Alcarrás» de Simón

O mércores 8 será o turno de Carla Simón, directora de Alcarrás, tamén con once nominacións aos Goya e gañadora do Oso de Ouro de Berlín o pasado ano. O filme é «unha homenaxe a unha familia de tres xeracións que se adica ao cultivo de melocotóns en Alcarrás».

Libertad é o título do filme que se proxectará o 15 de febreiro, de Clara Roquet. O ciclo rematará o día 22 con Las niñas, de Pilar Palomero. A película obtivo nove nominacións aos Goya e gañou no 2020 os premios de Mellor Película e Mellor Dirección Novel, entre outros.

---

---

---