Retirados 420 quilos de lixo de todo tipo da praia de Doniños, onde apareceron mortos 24 exemplares de Arao papagaio 

Apuntáranse 40 persoas, pero ao final tamén se sumou algún espontáneo. O sol axudou e a xornada de limpeza da praia de Doniños, en Ferrol, organizada pola Sociedade Galega de Historia Natural (SGHN) e Mar de Fábula, permitiu retirar 420 quilos de lixo, a maior parte de orixe doméstica, segundo explicou Xan Rodríguez Silvar.

Pero ademais dos plásticos ou redes que arrastraron os últimos temporais ata o areal, os participantes nesta iniciativa atoparon 24 exemplares de Arao papagaio (Fratercula arctica) mortos, un Paíño das tormentas «desfeito» e unha toniña, «un mamífero en perigo de extinción», indicou Rodríguez Silvar.

Este foi o segundo ano consecutivo que voluntarios coordinados pola SGHN e Mar de Fábula desenrolan este tipo de acción ambiental «para aliviar ao mar de todo o mal trato que se lle dá, de todo o que lle sobra, de todo o que non é seu».

---

---

---