O Concello de Ferrol continúa promovendo a práctica deportiva entre a poboación máis nova coa celebración da XIX edición do Circuíto Ferrolán de carreiras populares e campo a través, que inclúe catro xornadas. A primeira, tal e como trasladou o concelleiro de Deportes, Antonio Golpe, aos grupos municipais durante a comisión de área, terá lugar este mesmo domingo, 13 de novembro, a partir das 11 horas, no barrio de Canido. Participarán preto de 300 nenos dos centros escolares e clubs inscritos nesta primeira xornada e haberá 10 categorías, segundo a idade, e premios para os tres primeiros clasificados en cada unha, nas modalidades feminino e masculino. Pola súa banda, todos os participantes na categoría «peques» recibirán un agasallo. Trátase dunha iniciativa impulsada polo Concello de Ferrol en colaboración con Xogade e a Federación Galega de Atletismo. As próximas citas serán o 17 de decembro pola Malata, o 15 de xaneiro por Esteiro e o día 22 de xaneiro por As Cabazas.