Xosé Antonio Touriñán: «Emociona ver as nais de Érguete aplaudindo 'Fariña'»

Bea abelairas FERROL / LA VOZ

FERROL CIUDAD

Touriñán Aigi Boga

Regresa ó auditorio de Ferrol coa xira da historia dos narcos galegos: «En A Coruña fixemos 12 pases en tres días seguidos»

20 may 2022 . Actualizado a las 05:00 h.

Xosé Antonio Touriñán (Culleredo, 1980) estará hoxe e mañá no auditorio de Caranza dando vida a sete personaxes de Fariña, a adaptación teatral do libro de Nacho Carretero, que tamén tivo unha exitosa serie. A peza teatral é todo un fenómeno, que sigue enchendo teatros e xa sube dos 50.000 espectadores: «A acollida é fantástica, esta é unha rexira, porque xa estivemos nunha primeira volta e na última fixemos tres días seguidos dúas funcións, doce en total e sempre cheo, en Ferrol faremos un pase o sábado e outro o domingo».

—Xira intensa para os actores...

—Estamos moi orgullosos, porque non é nada fácil facer teatro en galego e encher en todas partes. Tamén é cansado, pero faise con moito gusto. Somos cinco actores en escena e non hai un papel protagónico, todos facemos sete, oito ou dez personaxes cada un. Todos cantamos, tocamos algo, bailamos e todos intentamos facer rir e poñernos serios. É un xogo moi divertido e moi bonito.

—Cal é a súa personaxe favorita?

—Podería ser Terito, o vello contrabandista de tabaco, no que máis cómodo estou. Pero todos, porque fago dende un político de Madrid ata un Garzón que aparece no medio de outros Garzóns cantando e bailando. E tamén fago de heroína, que tamén se torna en personaxe.

—Cando visita as zonas de Galicia onde estiveron todas esas persoas a obra xerará sensacións singulares...

—E por toda España, é fantástica a reacción do público a este espectáculo. A serie é marabillosa e este espectáculo non ten nada que ver coa serie, aquí a viaxe é mais parecida a do libro. Cóntanos unha historia que non rematou, porque segue entrando droga en Galicia. Cando se fai esta función en Vigo ou Vilagarcía é moi especial o que ven de volta do público. Toda esta xente viviuno dun xeito ou outro. Por exemplo as noites que estivemos en Vigo emociona, xa da primeira volta, ver as nais de Érguete aplaudindo Fariña dende o patio de butacas. Estaban Carmen Avendaño, Dora... Nais que formaron ese primeiro grupo que loitaron contra a droga... Que elas che dean as grazas é moi especial e que volveran a función.

—A xira está a piques de rematar, haberá outro proxecto similar?

—O equipo e a maneira de traballar seguirá e para proxectos futuros que inda non podo anunciar seguiremos contando coas historias de Nacho Carretero, Tito Asorey para a dirección.