A Fundación acolle este mes unha mostra bibliográfica de Carvalho Calero
FERROL CIUDAD
A exposición reúne máis de 50 obras do autor e documentos que o marcaron
12 jul 2021 . Actualizado a las 10:41 h.Co gallo da publicación de Ricardo Carvalho Calero, orador. Discursos e leccións, da man do Parlamento de Galicia, a sede ferrolá da Fundación Abanca exhibe unha ampla selección da bibliografía do autor que se inspira neste volume divulgativo. Pilar García Negro edita o libro e introduce a exposición: «A Galiza dedicou don Ricardo todos os seus afáns. Trinta anos despois o seu pensamento continúa vivo na nosa memoria agradecida».
García Negro guía esta exposición que orixinalmente se exhibiu no Parlamento de Galicia e que agora chega a Ferrol con fotografías e textos como novidade. Por unha banda, atópanse cadernos persoais, cartas que intercambiaba co intelectual Otero Pedrayo, entre outros; e por outra, as distintas pezas e os distintos xéneros que publicou ao longo da súa vida. Trátase dun percorrido biográfico pola obra do escritor de Ferrol Vello que pretende difundir a súa figura logo de que se celebrase (entre aspas, por mor da covid) a súa homenaxe polo Día das Letras Galegas o pasado ano. Scorpio e Xente da barreira, así como os Estudos rosalianos atópanse entre os tomos desta colección aberta a todos.
Pilar García Negro, editora do volume en cuestión e comisaria da mostra, insiste no prólogo de Ricardo Carvalho Calera, orador. Discursos e leccións na oportunidade que esta colección supón para atoparnos con achegas en vídeo e en prosa de grandes persoeiros da cultura galega, así como doutras moitas sorpresas. A selección pretende ser representativa dos principais fitos que marcaron a biografía do escritor, dividindo claramente tres etapas: a da infancia, a cátedra universitaria e obras adultas, e os seus últimos traballos, moi ligados á normalización lingüística e á promoción da lingua galega en todos os eidos.
Tamén se rescataron algunhas obras póstumas e antoloxías poéticas, á vez que estudos sobre a produción literaria e sobre a ideoloxía de Carvalho, ideoloxía que pervive aínda, e así explica a comisaria por que «Galicia existe» é unha oración recorrente en toda a exposición. Cando se pregunta a García Negro, descóbrese que Carvalho dixo isto no ano 1933, pero «a súa obra continúa interpelando. A afirmación de que o pobo galego existe implica unha derivada: a necesidade de que a lingua estea presente en todos os ámbitos, de que sexa unha lingua normal e ubicua».
Preguntada a comisaria tamén respecto á homenaxe do pasado ano polo Día das Letras, dedicadas ao autor ferrolán, responde: «As circunstancias anómalas do pasado ano obrigaban a continuar esta celebración da vida de Carvalho e sobre todo a continuar a facer xustiza á labor científica, artística e divulgativa de Calero».
As últimas entregas que se inclúen na colección foron integradas o ano pasado, cando se comezou a prestar máis atención ca nunca á figura do escritor de Ferrol. A comisaria convida a todo aquel que desexe achegarse á figura de Carvalho a pasarse polas instalacións e así gañar unha perspectiva diferente: «Inaugurouse esta selección bibliográfica no Parlamento de Galicia, en outubro do pasado ano, pero agora engadimos algunhas novidades interesantes, como unha serie de fotografías e amén algúns textos».