Abrindo Camiño


Para alcanzar un obxectivo, non chega con só desexalo, senón que hai que poñer os medios para iso. E este é un dos problemas do grupo de goberno, moi receptivo nas formas con entidades, pero escasamente resolutivo en moitas das demandas e necesidades expostas.

No Camiño Inglés temos, sen ningún xénero de dúbidas, unha ferramenta importantísima de dinamización e revitalización a todos os niveis: patrimonial, cultural, turística, comercial e hostaleira. E seguro que así o ve tamén o goberno local; por iso é polo que, por exemplo, reivindicara en varias ocasións a necesidade de contar cun albergue e reclamara a cesión do antigo edificio de Aduanas. Pero, por desgraza, non é suficiente. Se queremos poñer en valor esta ruta e aproveitar as súas potencialidades debemos ir máis aló. Debemos poñerlle cabeza e dedicarlle tempo e recursos, ademais de colaborar con aquelas institucións que si están a traballar de forma solvente e efectiva no Camiño Inglés, como é o caso da Deputación, que se está implicando -cun incansable Antonio Leira á cabeza- na posta en valor da ruta.

De nada serve pedir se desde a túa propia institución pouco ou nada se fai. A escasa presenza de Ferrol na recente feira do Camiño Inglés de Betanzos ou a negativa a participar en proxectos de dinamización, como o de Eduardo Hermida, dan unha idea do que sucede. Mentres, entidades e particulares seguen o seu propio camiño -e nunca mellor dito-, como é o caso do propio Hermida, o Club Montaña ou o Foro Ferrol Vivo, que acaba de presentar unhas guías sobre a Primeira Milla. O obxectivo: abrir camiño en Ferrol.

Conoce nuestra newsletter con toda la actualidad de Ferrol

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
2 votos

Abrindo Camiño