«As mulleres temos que traballar o dobre para conseguir a metade cós homes»

FERROL CIUDAD

Xoán Piñón

Gañadora dun Goya e dun Mestre Mateo por «Decorado», a produtora Chelo Loureiro recibe hoxe o galardón á Muller Ferrolá do Ano

08 mar 2017 . Actualizado a las 05:00 h.

Chelo Loureiro (Ferrol, 1958) leva toda a vida rompendo moldes. Foi das primeiras mulleres que entrou a traballar no naval, nunha oficina técnica de Bazán na que os homes, lembra ela, a miraban como se fose un «bicho raro». E agora, xa afastada dos estaleiros e tras pasar por diferentes experiencias profesionais, dedícase a pelexar contra vento e marea para sacar adiante proxectos dun tipo de cine, o de animación, que non sempre atopa tantos apoios como as películas con intérpretes de carne e oso. O seu traballo como produtora está detrás de títulos tan exitosos como A tropa de trapo, A flor máis grande do mundo ou Decorado, o corto de Alberto Vázquez polo que Chelo recolleu recentemente un Goya e un premio Mestre Mateo. E hoxe, no teatro Jofre (20.00 horas), esta muller emprendedora e soñadora engadirá un novo recoñecemento á súa lista de galardóns: o título de Muller Ferrolá do Ano.

-¿Contenta con este premio?

-Contenta, si, pero sobre todo abrumada. Teño recibido premios por empuxar o talento creativo, pero desde atrás, na sombra, e que me dean un premio así, en primeira persoa, é algo ao que non estou afeita.

-Vostede está abrir moitos camiños ao cine de animación feito en Galicia. ¿Resulta isto máis difícil sendo muller?