«O castro foi abandoado hai case dous mil anos»

A obra será presentada esta tarde ás 20 horas no local da asociación de veciños de Covas

Armada é investigador do Instituto de Arqueoloxía de Londres.
Armada é investigador do Instituto de Arqueoloxía de Londres.

FERROL

As pescudas ao redor do xacemento das illas de Santa Comba de diversos investigadores da Facultade de Humanidades de Ferrol e do CSIC, durante algo máis de catro anos, deron como resultado O xacemento de Santa Comba e a minería de Covas (Embora, 2014), que será presentado esta tarde ás 20.00 horas no local da asociación veciñal de Covas.

Xosé Lois Armada, doutor pola Universidade da Coruña, e Víctor Alonso son ademais de coautores, editores da obra. Armada, natural de Cariño, asegura que o libro «espertará o interese polo castro e o seu entorno».

-¿Cal foi o punto de partida desta investigación?

-Santa Comba era un xacemento que xa coñeciamos. Levouse a cabo unha excavación en 2001 e outra en 2006. A raíz desta última, e animados pola Sociedade Cultural Columba, decidimos continuar a investigación dende a universidade.

-¿En que consistiu o proxecto?

-Quixemos que fose unha especie de laboratorio de técnicas arqueolóxicas non invasivas. En primeiro lugar efectuamos estudos de prospección xeofísica, o que coloquialmente se coñece como «ver debaixo da terra», coa fin de detectar estruturas arquitectónicas soterradas sen necesidade de excavar. Outra técnica empregada foi o LIDAR, é dicir, imaxes aéreas xeorreferenciadas que nos permiten eliminar a cobertura vexetal e tomar medidas. Esta última foi útil na mina de ouro de Covarradeiras, unha explotación a ceo aberto. Puidemos medir o seu perímetro e a súa lonxitude. Tamén fixemos unha nova planimetría do castro, un estudo xeomorfolóxico e algúns estudos con Sistemas de Información Xeográfica.

-¿Que dificultades existiron?

Entre outras, o mal estado da escaleira de acceso á illa do medio, á que tivemos que entrar cunha escaleira de man. Tamén a densa cobertura vexetal na antiga mina de ouro de Ponzos.

-Canto tempo lles levou?

-Algo máis de catro anos. Comezamos cos primeiros traballos de campo en 2010 e rematamos de escribir a obra en setembro de 2014.

-¿Cal é a historia do xacemento?

-Estivo ocupado dende o século III A.C. ata mediados do século I da nosa era, polo que o castro foi abandoado hai case dous mil anos. Manexamos dúas hipóteses para o seu abandono. Unha está relacionada coa fin das actividades mineiras na mina de Covarradeiras, en Ponzos. A outra supón que nese primeiro século o castro empezou a súa conversión cara ás illas actuais. Despois dun lapso temporal, na época medieval construiuse a ermida de Santa Comba. O primeiro documento que a menciona data do ano 868.

XOSÉ LOIS ARMADA COAUTOR e editor CIENTÍFICO DE «o xacemento de santa comba e a minería de covas»

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos

«O castro foi abandoado hai case dous mil anos»