«Somos máis ben o partido do si»

O actual voceiro municipal do BNG di que sería un «desastre» manter a dinámica da cidade

Iván Rivas no baluarte de Canido, o barrio onde vive, e coa ría que defende ao fondo.
Iván Rivas no baluarte de Canido, o barrio onde vive, e coa ría que defende ao fondo.

Opta á alcaldía por vez primeira despois de tres anos como voceiro do grupo nacionalista en Ferrol. Iván Rivas Rico faino co obxectivo de revertir o declive de poboación e de emprego da cidade. E disposto a plantarlle cara ás políticas impostas desde a Administración central.

-¿Que aprendeu neste tempo na corporación ferrolá?

-Que contar cun goberno municipal capaz de defender e de recuperar a dignidade desta cidade para enfrontarse ás decisións que a administración estatal impón é fundamental. É fundamental cambiar o deseño político para o sector naval, que Defensa pague pola ocupación de máis do 20 % do solo urbano; que as edificacións desafectadas as entregue á veciñanza; é fundamental desenvolver infraestruturas ferroviarias básicas e un saneamento esixindo que o Estado pague algo da súa competencia, que limpe os fondos da ría e elimine barreiras artificiais como o porto carboeiro para permitir unha rexeneración natural.

-¿Onde ve ao BNG de Ferrol ao día seguinte das eleccións?

-No mesmo lugar que antes do 25: a carón dos veciños e de todos os conflictos que existen e que existirán nesta cidade.

-Eu ía por outro lado. A enquisa de Sondaxe deixa ao Bloque ao borde do 5 % dos votos, o mínimo para ter representación...

-O problema das enquisas é que condicionan o voto.

-¿Quedarse nun só concelleiro sería un desastre?

-O desastre é continuar na mesma dinámica nunha cidade na que se perderon 3.500 habitantes nos últimos cinco anos e na que traballa unha de cada tres. Iso si que é un desastre.

-¿Que fallou no BNG para pasar de ter o goberno a que agora teña dous concelleiros e que poda baixar máis o 24-M?

-A candidatura do BNG que se presenta é a única na que non existe nin un só candidato que formara parte de gobernos municipais anteriores. O obxectivo de todos nós é saber cómo encarar o futuro dunha cidade que é crítico pero que cren que ten futuro se pensamos por nós mesmos e asumimos esa responsabilidade. Non vai vir ninguén de fóra a resolver os nosos problemas.

-¿É o BNG o partido do non?

-Eu creo que as nosas propostas explican que somos máis ben o partido do si. Somos a organización política co programa eleitoral máis concreto e máis positivo das alternativas que se presentan.

-¿Por que os ferroláns teñen que votar ao Bloque?

-É obvio: o BNG é o que ofrece unha alternativa na que as decisións se toman en función dos intereses dos veciños e non en función dos intereses de Madrid.

-¿Prexudicará a irrupción de novas forzas?

-Máis aló do resultado eleitoral, o que me interesa é a capacidade que teñamos de condicionar e transformar á cidade xunto aos veciños a partir do 24.

DNI

Naceu en A Pontenova ?(Lugo) en 1976, aínda que aos tres anos mudouse a Ferrol. É arquitecto, profesión que exerce na actualidade, e reside no barrio de Canido. É afeccionado aos deportes.

Foi o número 3 nas municipais de 2011, e entrou na corporación ferrolá en xaneiro do 2012, trala renuncia de Xoán Xosé Pita, converténdose tamén en voceiro.

Conoce nuestra newsletter con toda la actualidad de Ferrol

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
12 votos

«Somos máis ben o partido do si»