Carlos Piñeiro: «A saúde precisa dun verdadeiro benestar psíquico, físico e social»

ramón loureiro FERROL / LA VOZ

FERROL

Ramón Loureiro

Defende a importancia de lograr que as cidades «sexan moito máis accesibles»

12 jul 2021 . Actualizado a las 18:00 h.

Carlos Piñeiro, médico de 66 anos, investigador e experto en saúde publica, traballou en todo tipo de ámbitos durante unha vida enteira dedicada ao mundo da medicina. Ademais de docente e coordinador de múltiples proxectos de investigación, foi desde médico de familia ata máximo responsable do complexo hospitalario Arquitecto Marcide. Autor de múltiples publicacións, impulsou iniciativas como o Proxecto Comunitario Cen Mil Motivos de Peso e Corazón. Pero del habería que dicir que é, sobre todo, ademais dun exemplo de xenerosidade e de búsqueda do ben común, un firme defensor da saúde como un dereito de todos, e un infatigable impulsor dos hábitos de vida saudables. Agora, en colaboración con outros expertos de diferentes países -tanto de Europa como de Asia e dos Estados Unidos de América-, traballa xa na búsqueda de novas estratexias destinadas a facer posible que, nun tempo no que a esperanza de vida é cada vez maior, os maiores poidan disfrutar sempre dunha boa calidade de vida.

-Máis alá da ausencia de enfermidade, que é, verdadeiramente, a saúde?

-Efectivamente, a mera ausencia de enfermidade non implica ter saúde. É algo moito máis amplo. A saúde, para merecer ese nome, precisa dun verdadeiro benestar físico, psíquico e social.

-Algo que non sempre é doado conseguir...

-Non, non é doado conseguilo, porque todo iso precisa xa, de entrada, da estabilidade de moitos factores, entre os que tamén está o económico. Pero a saúde é un dereito, e temos que asumir a importancia de acabar con moitas desigualdades que van en prexuízo da sociedade enteira.

-A pesar de todas as dificultades, os avances da ciencia fan posible que a esperanza de vida siga aumentando.

-A esperanza de vida aumenta, si. A xente vive cada vez máis tempo. Pero precisamente por iso temos que facer o máximo esforzo para lograr que o paso do tempo non traia, para os maiores, unha mala calidade de vida. Hai que coidar moito iso. Estamos falando de algo esencial. Estamos falando de dereitos.

-O coronavirus, máis alá das súas consecuencias directas, terribles todas elas, vai deixar na sociedade cicatrices moi fondas.

-Si, porque a pandemia puxo en evidencia problemas moi graves.

-Por exemplo...?

-As carencias que sofre a nosa sociedade no ámbito da protección social dos maiores. Unhas carencias que son dunha extraordinaria gravidade. Deberiamos ter presente en todo momento que conforme a idade avanza multiplícanse os factores de risco que levan a todo tipo de discapacidades. Hai que evitar que todo iso se cronifique.

-E non se está facendo?

-Non. Está claro que non. Ás veces somos moi insensibles. Fíxate no que acontece, sen ir máis lonxe, cos nosos espazos urbanos. Temos que facer que as nosas cidades sexan moito máis accesibles para todos... e para todos os estilos de vida.

«Cada euro destinado a unha boa alimentación aforra sete en gasto sanitario»

R.L.

Afirma Carlos Piñeiro que «cada euro destinado a unha boa alimentación aforra sete en gasto sanitario». E engade que algo moi semellante pasa, tamén, cos recursos que se destinan a fomentar o exercicio físico. Está absolutamente convencido de que as Administracións públicas deberían asumir, coa maior das urxencias, o reto de poñer os «hábitos de vida saudable» ao alcance de toda a poboación.

-Porque, como vostede subliña a miúdo, hai problemas que non só lles afectan aos maiores.

-Por suposto que non! Abonda con ver o que está a pasar entre os nenos, nos que cada vez hai máis problemas de sobrepeso e de obesidade. que teñen consecuencias gravísimas para a saúde e que, de non buscarlles unha solución canto antes, acabarán recortando a esperanza de vida.

Seguir leyendo