«Cada euro destinado a unha boa alimentación aforra sete en gasto sanitario»

R.L.

FERROL

Ramón Loureiro

12 jul 2021 . Actualizado a las 05:00 h.

Afirma Carlos Piñeiro que «cada euro destinado a unha boa alimentación aforra sete en gasto sanitario». E engade que algo moi semellante pasa, tamén, cos recursos que se destinan a fomentar o exercicio físico. Está absolutamente convencido de que as Administracións públicas deberían asumir, coa maior das urxencias, o reto de poñer os «hábitos de vida saudable» ao alcance de toda a poboación.

-Porque, como vostede subliña a miúdo, hai problemas que non só lles afectan aos maiores.

-Por suposto que non! Abonda con ver o que está a pasar entre os nenos, nos que cada vez hai máis problemas de sobrepeso e de obesidade. que teñen consecuencias gravísimas para a saúde e que, de non buscarlles unha solución canto antes, acabarán recortando a esperanza de vida.

-Haberá, nun futuro próximo, outras pandemias coma as do coronavirus?

-É altamente probable que as haxa. E non só porque nun mundo cada vez máis globalizado, no que é moi fácil ir dun lado a outro, os virus se poidan espallar máis facilmente, senón sobre todo porque o cambio climático está tendo unhas consecuencias terribles para moitas especies animais, que poden facer saír á superficie virus que se acaban contaxiando aos humanos e dos que ata hai moi pouco case non sabiamos nada. Estamos maltratando o planeta, e iso ten consecuencias. Parece mentira que non sexamos conscientes de que no podemos destruír a terra así.

-Que sería hoxe, na súa opinión, o máis urxente?

-Pois na miña opinión o máis urxente sería asumir a necesidade de vivir doutra maneira. Temos que respectar aos demais, e por suposto coidar deles; temos que coidar do planeta no seu conxunto, e temos que coidar, cunha perspectiva global, da saúde.