Sabela Sánchez, especialista do CHUF: «O pico da incidencia pode ser agora, pero o de ingresos virá máis tarde»

A internista sostén que o repunte ten relación coa relaxación no Nadal

Sabela Sánchez Trigo, especialista en Medicina Interna
Sabela Sánchez Trigo, especialista en Medicina Interna

ferrol / la voz

O elevado número de ingresos hospitalarios por covid-19 está a provocar que o Complexo Hospitalario Universitario de Ferrol (CHUF) teña que derivar pacientes a hospitais do Sergas de Lugo e Pontevedra. É una posibilidade prevista no Plan de Contixencia, como unha medida máis para poder dar resposta á situación cambiante que xera o coronavirus. Os traslados interhospitalarios que se fixeron ata o de agora foron sempre como medida de anticipación ao posible empeoramento de pacientes susceptibles de precisar coidados críticos na uci. A facultativa do CHUF Sabela Sánchez Trigo, especialista en Medicina Interna, asegura que o repunte de casos e de hospitalización aínda non chegou ao pico máis alto.

-¿Existe unha explicación ao elevado número de ingresos de pacientes covid, entre eles o de xente nova?

-O que estamos vendo é que hai moita hospitalización, que está relacionada directamente co incremento de afectados, igual que os falecementos. Cantos máis casos hai na poboación, máis pacientes acabarán nos hospitais. E canto máis maior é o paciente, o máis probable é que acabe hospitalizado ou incluso na uci. As cousas nesta infección teñen unha secuencia que se vai repetindo constantemente e non se modifica. Entre un 5 e un 10 % dos que se infectan van requerir hospitalización, e con bastante frecuencia, o ingreso en uci, porque necesitarán un soporte ventilatorio.

-¿Cal cre que pode ser a orixe deste repunte que está a haber agora?

-O incremento da incidencia, e polo tanto da hospitalización, está relacionado directamente coa relaxación das medidas anticovid que houbo durante as celebracións do Nadal. Parece claro que está relacionado con eso, e agora temos as consecuencias e probablemente aínda non estemos no pico máis alto da hospitalización.

-Pero fálase de que xa podemos estar acadando o pico desta terceira ola...

-O pico da incidencia pode ser agora, pero o pico da hospitalización virá máis tarde. Está claro que vai ser así.

-¿A elevada incidencia e hospitalización que se está rexistrando pode deberse á aparición doutras cepas do virus?

-Polo de agora non hai evidencia científica, non o temos confirmado. Os datos de letalidade non se están vendo incrementados. Non sei que papel pode xogar a presenza doutras cepas máis virulentas, pero o que sabemos con total seguridade é que está claramente relacionado coa maior sociabilización. Se se queren evitar os ingresos hospitalarios, hai que restrinxir os contactos. O virus ataca a base da nosa cultura, que é a sociabilización. Ese é o problema no que queremos incidir, co fin de acadar que haxa menos ingresos hospitalarios.

Sabela Sánchez , doutora: «O que vai salvar vidas está nas mans de todos, non só dos sanitarios»

Especialista en Medicina Interna

A doutora Sabela Sánchez Trigo incide nas medidas de todos coñecidas, pero non sempre se poñen en práctica, para poñer coto aos contaxios e á propagación do coronavirus. «O importante é evitar os contactos con persoas non convivintes, utilizar sempre máscaras faciais homologadas e ventilar os espazos pechados», apunta, engadindo que non se deben compartir espazos pechados. «Iso é o que vai salvar vidas, e está nas mans de todos, non só dos sanitarios», apostilla a especialista en Medicina Interna, recordando tamén a importancia do lavado e desinfección das mans e a necesidade de limitar as saídas do núcleo familiar de convivencia ao estrictamente necesario.

Seguir leyendo

Conoce nuestra newsletter con toda la actualidad de Ferrol

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
3 votos
Comentarios

Sabela Sánchez, especialista do CHUF: «O pico da incidencia pode ser agora, pero o de ingresos virá máis tarde»