«Os novos vanse e os vellos morren, había nove bares e agora queda un»

María Ángeles Figueiras, dona do bar Caracas, no Val de Xestoso, que hoxe pecha a porta


Monfero

Os clientes do bar Caracas do Val de Xestoso, en Monfero, andan algo tristes. Este domingo hai festa de despedida, con raxo e polbo. María Ángeles Figueiras naceu no lugar de Albite hai 67 anos e desde os 16, cando seu pai, Ángel, abriu o local, traballa no negocio familiar. «Daquela había moita xente, tiñamos un salón de baile aquí a 300 metros, había movida... Agora é unha peniña, os novos vanse e os vellos morren... Nesta parroquia había nove bares e agora vai quedar un», narra, con morriña, a propietaria do establecemento. Hoxe tócalle pechar a porta. «Levo toda a vida na taberna, e vaime custar, pero non podo seguir retrasando a xubilación e non atopei a ninguén que quixera seguir», conta. Súa nai, Divina, ten 92 anos, tamén vai vivir a clausura do Caracas. «Nas aldeas non é coma na cidade -subliña-, o bar é o punto de relación da xente, que vén e conta e comenta... Coñecémonos todos, é o lugar de reunión dos veciños, botan a partida...».

A mellor época no Val de Xestoso remóntase ás décadas dos 80 e dos 90: «Daquela había moita xuventude, hoxe vanse vivir a Ferrol, á Coruña ou ao estranxeiro, cada un busca a súa vida porque aquí non hai saída laboral. Antes vivíase da gandería e agora quedan dúas. Terreo hai, somos o segundo municipio de máis extensión da provincia, pero non queda xente para traballar». Por non haber, critica, «non hai nin plan xeral de urbanismo, e os fillos, que viven cerca, se queren facer aquí unha casiña non poden».

Cando, esta tarde, peche a porta o Caracas, no Val de Xestoso só vai seguir aberto o bar Casavella, no lugar de Xiao. «Fundouno meu avó na República, aló polo 31 ou o 32, eu crieime aquí», relata María Martínez, encargada do negocio, que complementan co de materiais de construción (Amador). Que desaparezan negocios «non é bo para ninguén». «É unha pena, non hai relevo xeracional, só quedan casas baleiras [...]. Moita xente non se vai de aquí porque queira, é porque non lle queda máis remedio, é inviable vivir aquí porque non hai servizos, e se tes fillos cando acaban a escola telos que levar ao instituto a 25 quilómetros [a Betanzos, As Pontes ou Guitiriz]», relata. A Xiao hai que ir adrede. «Estamos na estrada de Betanzos a Viveiro, que está morta, case sen tráfico, está ben para vir en bici ou en moto», apunta, convencida de que a súa parroquia, e o municipio enteiro, «ten moita potencialidade, se houbera unha administración que non hai». «Seguimos estancados de todo, detivémonos nos oitenta, morreu porque ninguén tirou. Estamos no parque das Fragas do Eume e todo son trabas e desidia, nin hai concentración parcelaria». ¿Como ve o futuro? «Non pinta nada ben, non se ven proxectos, nin ideas, nin nada, tiña que haber outra dinámica».

Conoce nuestra newsletter con toda la actualidad de Ferrol

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
6 votos
Comentarios

«Os novos vanse e os vellos morren, había nove bares e agora queda un»