Guillerme Vázquez: «O noso futuro político vai depender dun intenso traballo social»


O pasado 21 de outubro o BNG recibiu un durísimo revés electoral que o colocou como cuarta forza política do Parlamento galego. Un resultado que o devolvía a máis de vinte anos atrás. A fronte viña dunha fractura na asemblea de Amio, celebrada en xaneiro do 2012. Un ano despois, a organización vese na obriga de organizar un novo congreso que vai determinar o futuro político máis inmediato.

-O Bloque concorreu ás últimas autonómicas no peor dos escenarios posibles. ¿Pensa que o resultado do 21-0 reflicte o chan real do BNG?

-Evidentemente a nosa situación non era nada boa. Viñamos dunha saída da Xunta e de explicitar as diferenzas internas nunha situación na que a sociedade perdoa pouco. Máxime cando percibe que unha formación é unha gaiola de grilos. Pero eu creo que os teitos e os chans non están predeterminados. Oriol Junqueras, de ERC, contaba o outro día aquí como a súa formación subiu e baixou e como iso é un proceso normal das forzas en democracia. Pero o noso futuro político vai depender dun intenso traballo social por todo o país. E de facer comprender á sociedade galega que o que nós propoñemos é bo para Galicia, para a súa maioría social.

-¿Que BNG vai saír da asemblea de marzo?

-Eu agardo que sexa unha asemblea democrática. E que a libre decisión dos afiliados determine o rumbo da organización. Estivemos facendo un proceso participativo, aberto, de abaixo arriba, e agora as teses están a debate. Espero que salga un Bloque máis capaz de actuar neste contexto tan difícil porque o poder ten moito interese en desprestixiar as nosas alternativas.

-¿Pode a posición de Abrente romper a necesaria imaxe de cohesión interna?

-Non o creo. Eu remítome ademais ao que ten expresado o propio Carlos Aymerich en entrevistas concedidas aos medios de comunicación. Pero a min non me gusta facer de comentarista. Admito os posicionamentos de todo o mundo e a crítica e partir de aí pouco máis hai que engadir. Do que si estou seguro é de que a maioría determinará o que ten que ser o Bloque do futuro.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos

Guillerme Vázquez: «O noso futuro político vai depender dun intenso traballo social»