Ana Pontón: «Os acordos entre forzas son positivos, o monopartito de Feijoo foi desastroso»

«O BNG nunca tería apoiado a Marta Rivera de la Cruz, que se ten significado na loita contra a nosa lingua»

;
«Fumei algún porro, pero non me gustan nada» Entrevista a Ana Pontón, cabeza de lista do BNG por A Coruña

Santiago / La Voz

Ana Pontón (Sarria, 1977) prognostica unha derrota de Feijoo o 25S «sempre que o BNG obteña unha representación forte».

-En tempos, ao Bloque chegárono a votar case 400.000 persoas e nas últimas xerais, menos de 50.000. ¿Por que esa fuga?

-Houbo moitos cambios políticos nos últimos anos e mesmo lecturas erróneas que fixo o nacionalismo, pero estamos demostrando tamén que estamos nunha etapa nova. Moitas persoas senten que movemos fichas e agora están mirando para nós con ilusión e esperanza.

-¿Que lle di aos que aínda non senten iso? ¿Que ten o BNG?

-O BNG ten un proxecto sólido, que aprendeu dos seus erros, que está nun momento novo e no que poden confiar todas as persoas que están buscando que a política solucione os seus problemas, que cren que este país necesita unha alternativa que teña a súa cabeza e o seu corazón en Galicia, e que reclaman humildade, honestidade e proxectos alternativos.

-Estes días, como antes Rajoy e Sánchez en favor de PP e PSOE, desembarcan en Galicia para apoiar a En Marea Colau, Errejón, Garzón, Iglesias... Vostede ten dito que non precisa primos de Zumosol. ¿Dío porque o cre ou porque non os ten?

-Cando os galegos comecemos a mirar máis para nós e a confiar nas nosas propias forzas, no noso potencial como país, sairemos adiante. Nós temos referencias importantes de cambio na política municipal: alcaldes que no seu día a día xa fixeron as súas pequenas revolucións nos seus concellos e que están todo o ano defendendo os intereses dos galegos. É curioso que algunhas forzas políticas confíen tan pouco nos seus líderes que necesiten reforzalos con estrelas invitadas.

-Con esas estrelas compartirá mitin Beiras, quen esta semana a atacou. Se o tivera agora mesmo diante, ¿que lle diría?

-Que non ofende quen quere, senón quen pode. Beiras decepcionoume profundamente.

-En Marea acaba de pactar con Ciudadanos un reparto de cargos no Congreso. Fernán-Vello teno xustificado alegando que en política, de cando en vez, hai que tragar sapos. ¿Coincide?

-En absoluto. O BNG nunca tería apoiado a Marta Rivera de la Cruz, que se ten significado na loita contra a nosa lingua, para ser presidenta da comisión de Cultura no Congreso. É un erro.

-Máis alá dese episodio, ¿realmente a política é tragar sapos?

-Non o creo, é defender ideas e facer realidade proxectos.

-Coa perspectiva do tempo, ¿cal é a súa análise daquel bipartito PSOE-BNG que Feijoo tanto critica?

-Foi un Goberno que fixo moitas cousas ben, no que o BNG aportou políticas moi beneficiosas para este país, como un banco de terras, acabar co espolio enerxético, a defensa da cultura e da vivenda, as políticas de benestar... Logo houbo un resultado no que os cidadáns decidiron non revalidar esa maioría. É evidente que se cometeron erros...

-¿Cales?

-Creo que houbo a veces demasiada preocupación máis pola competición interna que por dar unha imaxe de cumprimento dun acordo de goberno, e que o Partido Socialista actuou en ocasións con irresponsabilidade enfrontándose a cambios que estaba poñendo sobre a mesa o BNG, e iso tivo un custe a nivel electoral, á marxe da sucia campaña que fixo no ano 2009 o señor Núñez Feijoo. Pero agora o que se xulga é o Goberno de Feijoo, o peor na historia deste país. No 2016 non podemos seguir no 2009.

-Admite exceso de «competición interna». Se ocorreu iso entre dous, ¿por que non entre cinco?

-Dicir que un monopartito é máis democrático e funciona mellor que un goberno de varias opcións políticas... aínda está por aparecer alguén que o demostre. Nós aprendemos dos erros do pasado e estamos nunha nova etapa. Os acordos entre organizacións políticas e o diálogo son positivos, sempre. E o monopartito de Feijoo foi desastroso para o país. O BNG é clave para a súa derrota.

-¿Sería Ana Pontón conselleira de Villares ou só o faría presidente e o deixaría en minoría?

-Ana Pontón para o que se presenta é para presidenta de Galiza.

-¿Non pode facer o exercicio de poñerse nun escenario posible?

-Nós dixemos moi claro que non imos deixar que goberne a dereita, non imos cometer a irresponsabilidade que cometeron PSOE e Podemos en decembro. E o que fagamos a partir do día 25 dependerá do que decidan os galegos co seu voto.

-¿Non cre que os galegos teñen dereito a saber que van facer vostedes co seu voto antes de decidir a quen llo dan?

-Si, xa o saben perfectamente.

-Non. Non aclara se formarían vostedes parte dun Goberno ou só apoiarían a súa constitución.

-Esas son cuestións que non se poden abordar agora mesmo antes dunhas eleccións. Creo que estou sendo suficientemente clara a respecto de cal é a nosa estratexia de pactos, de cales son os nosos obxectivos. O que teñen que valorar os galegos é se queren que haxa un Goberno que impulse propostas como as que está defendendo o BNG.

-De todas esas propostas do seu programa, escolla tres.

-Poñer en marcha unha tarifa eléctrica propia, a renda de integración social e a eliminación de todos os pasos que se deron contra a lingua galega.

-Vostede cursou Ciencias Políticas, pero en realidade quería estudar Xornalismo. ¿Que titular lle gustaría ler na primeira páxina dos xornais o 26 de setembro?

-Por primeira vez, Galiza ten unha presidenta nacionalista.

«O ano pasado gañei 50.000 euros e 14.000 doeinos ao Bloque»

-¿Canto diñeiro ingresou o ano pasado?

-Uns 50.000 euros, pero en torno a 14.000 doeinos ao BNG.

-¿Que patrimonio ten?

-Un piso hipotecado e un coche.

-¿Ten fumado porros?

-Pois si.

-¿Moitos?

-Non, non me gustan nada. Parécenme unha perda de tempo.

-¿Colabora con algunha ONG?

-Si, con Adega.

-¿Cantos libros ten lido este ano?

-Moi poucos, menos dunha ducia.

-¿Cantas veces ten doado sangue este ano?

-Ningunha, non puiden porque tiña o ferro moi baixo.

-¿Estivo no paro algunha vez?

-Si.

-¿Cantos traballos tivo na súa vida?

-Entrei como deputada tendo 26 anos [hoxe ten 39] e antes estiven asesorando como politóloga a un grupo municipal.

-¿Cantas horas durme cada día?

-Na campaña, 5 ou 6; normalmente, procuro durmir entre 7 e 8.

-¿Fuma? ¿Bebe alcol?

-Tomo algún viño, como todo o mundo. E deixei de fumar hai dous anos.

-¿Como se chama ou chamaba a discoteca da súa vida?

-Litmar.

-¿En que animal se reencarnaría?

-Nunha aguia.

-¿Que asignatura persoal pendente ten na vida?

-Escribir un libro.

En tres palabras

Alberto Núñez Feijoo. O amigo dun narcotraficante.

Xoaquín F. Leiceaga. Foi un parlamentario solvente.

Luís Villares. Un maxistrado competente.

Cristina Losada. Basta ver a entrevista en Vía V. 

A miña porra

PP | 36-37

PSOE | Menos de 18

En Marea | Non sei

BNG | Máis de 7

Ciudadanos | 0

Outros | 0

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
38 votos
Comentarios

Ana Pontón: «Os acordos entre forzas son positivos, o monopartito de Feijoo foi desastroso»