Xavier Vence: «Hai que reinventar o nacionalismo para resintonizar coa xente moza»

O portavoz nacional do Bloque Nacionalista Galego aposta por abrir un debate «sereno e sen tabús» sobre o modelo organizativo e futuras alianzas


Santiago / La Voz

Por vez primeira dende 1996 o BNG queda sen representación no Congreso e toca chan tras unha perda ininterrompida de apoio electoral dende o ano 2000.

-¿Agardaba vostede un retroceso desta envergadura?

-O resultado foi moito peor do previsto. Esperábase unha perda de apoio, pero non tanta, sobre todo polo esforzo feito pola candidatura, cunha campaña nova e creativa.

-¿A que cre que se debeu entón?

-Á dinámica política a nivel de Estado e á presión das televisións que apostaron por un panorama a catro, que creou un contexto no que as únicas opcións que se percibían con recorrido eran as estatais.

-Iso como factor alleo, pero os electores veñen dándolle as costas ao Bloque dende hai xa moito tempo. ¿Cales son os erros atribuíbles ao BNG e a Nós?

-É difícil sintetizar en poucas palabras un diagnóstico de por que se perdeu apoio social nestes últimos 15 anos. Houbo un equilibrio complexo entre tocar poder e ser alternativa, o que acabou provocando unha certa esquizofrenia no nacionalismo e na organización.

-¿Entón foi o bipartito unha experiencia negativa?

-Non, foi positiva, o que digo é que tivo un efecto de distorsión sobre unha base do proxecto que se movía en parámetros máis esquerdistas e máis radicais; a xestión dese equilibrio resultou complexa, e iso se plasmou nunha certa fragmentación do propio espazo nacionalista.

-¿Non cre vostede que a deriva soberanista do Bloque acelerou a perda de apoio social?

-Ao meu entender esa non é a principal causa. Puido parecer que o perfil soberanista predominaba, pero o certo e que nós fixemos un esforzo e un traballo nas institucións dándolle alternativas aos problemas dos recortes de servizos públicos e ao futuro de sectores estratéxicos. Estivemos moi pegados aos problemas do país e moi pouco axitando a bandeira soberanista.

-¿Pensou vostede en dimitir?

-Cando acontecen contratempos desta dimensión un pensa en todo. Pero non é o momento das decisións persoais, aínda que sexa o máis cómodo. A miña preocupación agora é iniciar un proceso de debate en asembleas abertas e encamiñar o proceso da asemblea nacional de marzo.

-¿Deixa o 20D ao Bloque como unha ferramenta xa amortizada para conducir un novo proceso?

-Eu parto da base de que a prioridade ten que ser a preservación do proxecto nacionalista; para que iso teña respaldo é a organización a que ten que acomodarse ao obxectivo. Por tanto, non exclúo ningunha opción.

-¿Crear incluso un novo partido?

-Hai que reinventar o nacionalismo galego para atraer á xente moza, resintonizar con ela; temos dificultades para conectar coa xente nova nas cidades; de como fagamos iso é do que se vai falar agora; temos que abrir un debate sereno e sen tabús, falar de todo o que sexa necesario. Tamén hai que lembrar o recoñecemento que hai do BNG e do seu papel positivo, algo que transcende a súa base social e aos seus votantes. Se non houbera Bloque, habería que inventalo. E isto llo teño escoitado a xente que vota ao PP.

-¿Puido ser un erro agochar a marca do BNG nestas eleccións?

-É certo que polo esforzo feito para chegar a unha candidatura de unidade tivemos logo pouco tempo, pero non creo que iso tivera unha incidencia determinante no resultado.

-¿Por que fracasaron as negociacións coa Marea? Beiras dixo antonte que lle garantían ao BNG un grupo galego...

-Podemos non tivo ningún interés en que nós participáramos desa candidatura. E a negociación fracasou porque puxeron de inicio condicións inasumibles. Nós pensábamos que iso ía impedir formar grupo propio.

-Pero agora o van ter...

-Ímolo ver: unha cousa é un grupo propio dentro de Podemos, supeditado a súa estratexia, e outra que sexa un grupo parlamentar realmente independente. Hai cuestións que son chamativas.

-¿Como cales?

-Beiras dixo que estaba disposto a ser candidato se se daban unhas condicións, pero non encabezou ningunha lista. ¿Por que non se deron esas condicións?

-O actual nivel de apoio pon en entredito a presenza do BNG no Hórreo. ¿Pode precipitar isto un desexo nas bases para confluír coa Marea como único camiño de salvación?

-Os resultados das xerais non son estritamente extrapolables. Estamos ante un escenario que compre avaliar con todo o realismo necesario porque é un equilibrio complexo. Eu teño claro que o proxecto nacionalista ten que ter unha voz propia e un espazo propio, pero sen poñer en risco este principio haberá que reflexionar sobre as alianzas para ensanchar a base electoral.

-¿E por que agora podería valer o que non serviu para as xerais?

-No 20D hai unha razón clara: Podemos quería poñer como condición para a súa candidatura que figurase o seu nome nas papeletas; e xa digo que para nós era inasumible; a política de alianzas vai estar condicionada a que o proxecto nacionalista non quede solapado por unha confluencia, ten que preservar a súa autonomía.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
31 votos
Comentarios

Xavier Vence: «Hai que reinventar o nacionalismo para resintonizar coa xente moza»