«Hai párrocos que me apoian pola separación de poderes coa Igrexa»

Afirma que o presidente da Xunta ten que ser consciente do rol capitalino que lle corresponde á cidade de Santiago e actuar en consecuencia


santiago / la voz

Martiño Noriega, de Compostela Aberta, asume o reto de gobernar a capital galega. Traspasoulle os poderes Agustín Hernández de quen, por certo, eloxia a súa plena disposición e cordialidade.

-¿Que significado simbólico e político ten ser alcalde capitalino?

-É unha gran responsabilidade. Temos que demostrar que sabemos facer políticas diferentes máis alá do cambio de caras, e en Santiago, que é a capital do país, cunha carga simbólica elevada.

-¿Entenderao a Xunta?

-Debera. O debate das posicións ten que quedar aparcado e dar paso ás relacións institucionais, de recoñecerlle á cidade a capitalidade. As ferramentas ca capitalidade están hoxe moi esclerotizadas, tanto na deriva do Consorcio, hoxe un apéndice do Estado, como a propia perda de fondos que a Xunta recolle nos seus orzamentos. Por iso a necesidade do diálogo institucional.

-¿Como son as relacións co presidente da Xunta?

-Tiven contacto con el como alcalde de Teo e coñézoo de anos antes de ser presidente. O trato foi correcto. As posicións políticas son antitéticas, pero non se poden confundir coas institucionais. Non aspiro a levarme ben co presidente, senón de xeito correcto en beneficio da cidade.

-¿Tan farta estaba a xente para que ocorrera este tsunami?

-Creo que si, pero ninguén me cría cando a última semana dicía que Compostela Aberta podía ser a lista máis votada. Iso séntese, e se as cousas se fan ben acaba tendo un retorno porque a xente estaba moi cansada e demandaba un cambio. Ademais, nós na campaña tivemos moita presenza social, con máis de cincuenta actos en parroquias e barrios. Aí vivimos o malestar da xente, que valorou tamén que nós lle dixeramos que non iamos venderlles unha moto.

-¿Goberno en coalición ou con pactos?

-Somos a lista máis votada e temos unha marxe importante para gobernar, pero tendémoslle mans a PSOE e BNG. O Bloque está aberto a máis posibilidades de goberno, mesmo a integrarse. Hai que abordalo nas próximas datas. O que estamos dispostos é a manter un diálogo permanente.

-E a pasar páxina con vellos litixios.

-No meu caso nunca existiu un litixio co BNG. Houbo moitas críticas nestes tres anos, pero non podo renegar do intenso traballo que fixen nese espazo.

-Agora o BNG plantexa retos nun espazo conxunto.

-Pero como o de antes non pode ser, porque non falamos xa de nacionalismo de esquerdas, senón dun concepto máis amplo como é a unidade popular, e aí as forzas nacionalistas teñen que aportar as reivindicacións nacionais, pero tamén teñen que aprender a convivir coa esquerda federal.

-O tópico de que esta cidade é conservadora parece romperse.

-Ese cliché despois destas eleccións non se sostén. Fomos a lista máis votada e iso nos dá unha lexitimidade terrible. A cidade quixo marcar un rumbo diferente ao destes catro anos.

-A ofrenda ¿un antes e un despois na separación de poderes?

-Hai que desdramatizalo porque non é un debate que estea na rúa. Durante a campaña electoral nos múltiples encontros que tivemos nunca se mencionou iso. Non podemos mesturar o espazo cívico co relixioso. Levámolo no programa e queremos manter unha posición coherente. Iso non é contraditorio con manter un diálogo coa Igrexa. Estes días recibín apoios, mesmo de párrocos da cidade. As tradicións non se rematan, nós só definimos o rol das institucións.

-¿De párrocos, dixo?

-Si. Hoxe veume un párroco a dicirme que apoiaba a posición de separación de poderes. E díxome que hai máis párrocos da cidade que nos están apoiando. Con este exército non hai derrota posible.

-¿Ata que punto é factible unha cidade sen desafiuzamentos?

-No que eu anunciei hai unha carga simbólica e unha vontade de que a institución encare este problema. A institución toma conciencia do que está pasando e aínda que non ten competencias si ten vontade de exercer presión institucional e dicirlle ás entidades bancarias que non nos é indiferente deixar a homes e mulleres na rúa nunha grave crise económica. É necesaria a sensibilización das institucións.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

«Hai párrocos que me apoian pola separación de poderes coa Igrexa»