Xogador de tute, José Manuel Blanco, candidato de Tega en Narón, di que os veciños nunca lle cantaron as corenta pola rúa
11 may 2015 . Actualizado a las 07:08 h.Anda José Manuel Blanco (Ferrol, 1952) entre A herencia, de John Grisham, e un libro de diferentes autores sobre Podemos. «Hai que estar ao día», di o candidato de Terra Galega (Tega) en Narón. Leva na corporación desde o 83 e ten o bastón de mando desde o 2009. O seu é dos poucos municipios de Galicia que gañan veciños. Chegou aos 40.000. Blanco explícao «co chan industrial que se ofreceu cando a reconversión naval dos oitenta, a autopista con saída ao centro do municipio, e servizos coma as escolas infantís ou o auditorio». O de que Narón sexa territorio do Tega resúmeo cun: «Somos distintos»
-Fálase de amplas maiorías. Pero aquí hai un cuadripartito.
-Tivemos a maioría en todos os mandatos, pero só unha vez a absoluta. Foi o peor mandato, como se nos collera unha soberbia e souberamos de todo. Nós pactamos con todos. EU, PP, BNG, PSOE...
-Algúns dirán que pactan con calquera.
-O que se quere sumar ao noso proxecto, faino. Houbo temas, como o saneamento da ría, no que un dos grupos do goberno se abstivo e o outro opúxose. Pero non rompeu o pacto. Dicíannos: «É unha loucura, catro nun goberno». A min gustaríame ter gobernado cos cinco grupos. Estes catro anos, con catro grupos no goberno, nunca mellor se traballou. Catro sensibilidades e un goberno. Non coma o reino de taifas do bipartito do PSOE e o BNG na Xunta. Iso non ía consentilo. Na Xunta e en Madrid é máis difícil pactar. O Parlamento trata as súas cousas, moitas veces fóra da realidade.
-Pensa que é certa a impresión desa burbulla de certos políticos.
-Si. Tratan asuntos que ninguén lles pide que traten. O aborto, as taxas xudiciais... Teñen que lexislar para que ninguén pase fame en España, e que a educación e a sanidade sexan públicas, gratuítas e de calidade.
-Pero está a débeda...
-En Narón temos dous millóns de superávit. É denigrante que obriguen a pagar débeda e non se poda gastar en servizos públicos. O crédito máis grande que temos é un de 5 millóns. ¿Co Euribor case a cero vou pagar? Négome. Como me nego a que se diga que todos os políticos son corruptos.
-¿Algunha espiña cravada?
-A nós cedérannos 30.000 metros cadrados de zona verde. Pero chegou a autopista. Ou se litigaba para paralizala ou se deixaba pasar. Optamos polo segundo e perdemos un pulmón no centro.
-Saíron protestóns co centro de saúde, as escolas infantís...
-O PP quedou doído. Pensaban que ían gañar aquí. Notouse na Deputación da Coruña e na Xunta. Tivemos que ir ao Defensor do Pobo e ao xulgado por certos convenios. ¿É tan difícil fixar criterios nas axudas para evitar o clientelismo? Somos o cuarto concello da Coruña. Que en catro anos o presidente da Deputación non nos visitara oficialmente...
-¿Como é o trato con Ferrol?
-Moi difícil. Había un acordo marco para varios temas. Pedimos unha reunión un mes despois das eleccións e aínda estou esperando.
-Dunha fusión nin falamos.
-Se non hai acordos puntuais, ¿como vai haber fusión?
-¿Tega podería ter ocupado o espazo dos novos partidos?
-Non somos cabeza de nada, queremos formar parte dun proxecto nacionalista e progresista para Galicia que aínda non chegou. Non creo que os novos partidos sexan a solución, pero fan espabilar aos grandes e iso era necesario.
-¿Como ve aos seus aliados naturais en Galicia?
-BNG, Somos Nós, Anova... Para chegar a unha alternativa nacionalista e progresista temos que baixar da burra dos protagonismos persoais. Agora mesmo é utópico.
-¿Chega en forma ás eleccións?
-Levaba anos indo ao ximnasio e tamén indo a andar. Pero nestes últimos cinco meses non fixen nada e engordei cinco quilos. Teño a ficha para volver ao ximnasio en setembro. Reláxame moito.
-Si que xoga ás cartas.
-Son un profesional. Sobre todo do tute. Traballei 36 anos en Fenosa e facíamos campionatos. Temos unha vitrina chea de trofeos.
-¿Quen lle cantou as corenta ultimamente?
-Hai visitas de nenos ao concello e unha das preguntas me fan ultimamente é se me insultan na rúa. Pero nunca tiven un incidente.