¿Que faría se fose presidenta... Sabela Ramil?

ELECCIONES 2020

SABELA RAMIL
SABELA RAMIL MARCOS MÍGUEZ

A cantante galega cree que é necesario impulsar «un servizo de saúde mental de calidade» e facer programas de acompañamento psicoemocional para toda a xente 

10 jul 2020 . Actualizado a las 05:00 h.

Sabela Ramil deixa por un intre o micrófono e sitúase en San Caetano dirixindo o Goberno galego. Cal sería a primeira medida? «Para empezar, sacar a froita podre do froiteiro, que pode contaminar, para non podrecer eu tamén», sinala entre risas. E logo buscaría un lema: «Na miña casa sempre poño follas nas paredes con mensaxes, e na Xunta poría algo como “Sempre se pode mellorar”. Esa sería a clave».

En xeral, Sabela Ramil di que buscaría «mellorar a calidade de vida das persoas». De maneira máis específica, nótase que é terapeuta ocupacional. Apunta a necesidade de mellorar un aspecto moi concreto da sanidade: «Faría un servizo de saúde mental de calidade, con persoal suficiente para toda a poboación, e tamén programas de acompañamento psicoemocional para toda a xente de Galicia. Non fai falta estar mal e ter unha enfermidade para intervir», di.

Estas melloras propiciarían, dende a súa visión, o acceso ás terapias, sexa a un logopeda, a un psicólogo ou a terapia ocupacional. «O que non pode ser é ter que esperar un ano por un terapeuta, paréceme incrible». Toda esa preocupación pola saúde mental conéctaa coa educación: «Protexería un 100 % aos nenos e ás nenas. Eles non son culpables desta sociedade. Protexería a súa saúde psicoemocional desde pequeniños, e valoraría que a educación fose mais alá, que tivese esa compoñente psicolóxica, física e nutricional».