Ana Pontón: «A decepción coas mareas é unha opinión que se palpa na rúa»

A portavoz nacional do BNG reivindica que a xestión do partido nos concellos axuda a «mellorar a calidade de vida das persoas»


santiago / la voz

Ferrol, Narón, Betanzos e Lugo son os puntos que onte tocou Ana Pontón (Sarria, 1977) nunha campaña á que está entregada para intentar confirmar a recuperación electoral do BNG e a súa utilidade para mellorar a vida da xente dende os concellos.

-Aos domicilios chegan cartas do BNG coa súa foto para votar, pero non é candidata.

-Non, pero son portavoz nacional e apostamos por esa vía porque é máis barata. É bo aforrar gasto público nunhas eleccións.

-Quen é o adversario do BNG?

-Non nos presentamos contra ninguén, senón a favor de poñer en marcha políticas transformadoras nos concellos. No BNG sabemos facelo, e presentámonos a favor dos veciños.

-Que foi da «dereita cavernícola» contra a que loitaban nas xerais?

-A dereita segue a ser igual de cavernícola, só que tivo un gran correctivo nas urnas, e do que estou convencida é de que o BNG está en cambio de ciclo, somos unha forza política á alza, e imos ter un gran resultado.

-Á alza, pero con cal obxectivo?

-Imos a por todas, sen poñernos límites. Hai moita xente que volve mirar ao BNG, que confía noutra Galicia posible fronte á decepción do bipartidismo e desas fórmulas que viñan a mudalo todo e que non son capaces de xestionar o día a día.

-A ver, escolla un modelo: Muras ou Pontevedra?

-Os dous forman parte do mesmo proxecto, que consiste en utilizar todo o potencial para mellorar a vida das persoas. En Muras fixémolo utilizando os recursos dos muíños de vento para abaratar a factura da luz da xente, e en Pontevedra fixemos unha transformación que é referente internacional en mobilidade e calidade de vida, premiada pola ONU.

-Feijoo adoita dicir que Pontevedra é cidade referente en paro.

-Mente. A cidade de Pontevedra está entre as que teñen menos paro de Galicia. Sorprende que Feijoo culpe aos alcaldes do paro, e non asuma que ten expulsado a 200.000 mozos de Galicia en dez anos por falta de expectativas laborais. Só se dedica a facer oposición a quen o fai ben.

-Neste mandato o BNG votou moito con Marea Atlántica e Compostela Aberta. Poderán agora gobernar xuntos?

-Non podemos falar de pactos antes de que falen os cidadáns. O que temos moi claro é o compromiso evidente de que non imos permitir que goberne a dereita.

-Pero ve ao BNG gobernando con Noriega en Santiago?

-O que me gustaría ver é a Goretti Sanmartin de alcaldesa, porque encarna o proxecto que necesita unha cidade que pasou catro anos en branco e negro co PP e outros catro de decepción con Compostela Aberta.

-Francisco Jorquera tamén fala de decepción coa xestión da Marea Atlántica da Coruña.

-A decepción coa Marea é unha opinión que se palpa na rúa.

-Só na Coruña?

-Non, tamén noutras cidades, como Ourense, onde hai moita decepción pola parálise que provocou un PP que non foi capaz de aprobar un só orzamento en catro anos. O proxecto do BNG quere ilusionar fronte á decepción que deixaron uns e outros.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
54 votos
Comentarios

Ana Pontón: «A decepción coas mareas é unha opinión que se palpa na rúa»