Villares: «Se en Galicia non hai extrema dereita é debido a que os designios de Vox están cumpridos polo PP de Feijoo»

En Marea denuncia os «pasos atrás» no emprego do galego e reivindica políticas que promovan o seu uso os «365 días do ano»


Santiago / La Voz

En Marea denuncia os pasos atrás que as políticas lingüísticas da Xunta de Galicia teñen experimentado nos últimos anos e insta ao goberno galego a implicarse de xeito activo e efectivo na defensa do galego. No día das Letras Galegas o voceiro e a vicevoceira da formación denunciaron a anomalía democrática que supón o feito de que nas aulas de Galicia non poida ensinarse matemáticas ou física e química na lingua propia. Tamén a candidata de En Marea-Compromiso por Europa reivindicou a necesidade dunha maior implicación das administracións na defensa do galego. E instou ao goberno central a demandar a oficialidade da lingua galega no Parlamento europeo. 

«Cando hai unha dictadura, toque de queda, a xente ten que quedar na casa sen poder saír. Iso é o que está acontecendo coa lingua galega na ciencia desde que goberna Núñez Feijóo. Temos unha prohibición legal de poder explicar en galego as matemáticas, a física… Unha situación predemocrática, un estado de excepción co que queremos rematar xa», denunciou dende a manifestación de Queremos Galego en Lugo o voceiro de En Marea. Luís Villares criticou as políticas restritivas e totalmente contrarias á promoción e defensa do galego impulsadas polo goberno do Partido Popular. E destacou que, se «en Galicia non hai extrema dereita é debido a que os designios de Vox están cumpridos polo PP de Núñez Feijóo. Por iso hoxe temos que reclamar liberdade, igualdade e xustiza para o galego en relación co castelán. Para poder vivir con liberdade no ensino, pero tamén na ciencia», indicou Villares, quen destacou a importancia estratéxica do eido científico. «O futuro está na ciencia, na tecnoloxía, e Feijóo ten prohibido o uso do galego nese ámbito. É momento de levantar esas prohibición para que explicar matemáticas en galego nos centros de ensino deixe de ser ilegal», reivindicou.

Na manifestación Queremos galego de Santiago, a candidata de En Marea ás eleccións europeas, Lidia Senra apelou tamén á necesidade de que o goberno central actúe para defender o carácter plurilingüístico do estado e para garantir os dereitos das linguas diferentes do castelán en Bruselas. «Queremos reivindicar que o goberno do estado dea un paso adiante e comunique ás instituicións europeas que quere que o galego sexa tamén lingua oficial no Parlamento europeo», demandou.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Villares: «Se en Galicia non hai extrema dereita é debido a que os designios de Vox están cumpridos polo PP de Feijoo»